OEKUSI, 26 Marsu 2025 (TATOLI) – Inséndiu hamate Fernando Punef ho idade 10, iha loron tersa maizumenus tuku 19:40, iha Bairru Huaknutu, aldeia Kuat-Enes, suku Lela-Ufe, sub-rejiaun Nítibe Rejiaun Adminsitrativa Espesiál Oekusi Ambeno (RAEOA)
Matebian Fernando Punef moris iha loron 19 Janeiru 2015, oan husi Miliquior Punef no Maria Madalena Falo, daudaun matebian frekuenta hela estudu iha Eskola Bázika Filiál (EBF) Eno-Nesu, suku Lela-Ufe.
Matebian nia aman Miliquior Punef, relata katak kronolojia inséndiu la’os sunu lilin maibé mai husi sirkuitu eletrisidade ne’ebé akontese iha tuku 20:40.
“Horsehik ami ba iha to’os mai fali isin moras ami toba sedu de’it kalan akontese tuku 20:40, hanesan ne’e, ami toba ona hakfodak fiu tarutu no ahi monu tuun mai, nune’e ha’u hamri’ik kous nia bin ne’e lori uluk sai ba li’ur ba so’e de’it, atu mai fali foti nia alin mane (Fernando) ne’e, tama ladi’ak ona ahi komesa sa’e maka’as, ha’u tenta atu tama mak ahi han tiha ha’u-nia liman sorin,” nia haktuir bainhira hetan vizita husi Autoridade Protesaun Sivíl, ohin.
Nia informa, antes ne’e matebian Fernando estuda hela ho bin atu prepara ba ezame iha fulan-Abríl, maibé to’o tuku 19:00 liu la kontinua estuda ona tanba dukur, nune’e deside toba hamutuk de’it iha biti ida.
“Ha’u triste tanba durante ne’e laiha problema kona-ba ahi, só kalan ne’e mak akontese hanesan ne’e, ne’ebé ha’u reza nafatin ba ha’u-nia oan atu hetan fatin di’ak iha reinu lalehan” dehan nia ho triste.
Iha fatin hanesan, Komandante Operasaun Autoridade Protesaun Sivíl (APC), Oekusi, João Sila, informa bazea matadalan APC katak inséndiu ne’e tama iha kategória aat totál ba uma no halakon ema nia vida.
“Entaun dadús ita foti ona sei submete ba nasionál atu hetan apoia materiál konstrusaun ho pakote kompletu ba uma ida nian, no ohin ita apoia emerjénsia hanesan ai-han no la’os ai-han,” nia informa.
Entretantu, tuir observazaun Jornalista TATOLI, I.P, katak daudaun ne’e família sira hala’o ona serimónia funebre ba matebian iha semitériu Kuat-Enes, suku Lela-Ufe.
Jornalista: Abílio Elo Nini
Editór: Florencio Miranda Ximenes
