CAC hatun despaisu verifika dadus merenda eskolár molok halo investigasaun
DILI, 20 Outubru 2026 (TATOLI)—Komisaun Antí-Korrupsaun (CAC) husi parte investigasaun halo ona despaisu hodi orienta investigadór sira rekolla informasaun liga ho programa merende eskolár iha territóriu Timor-Leste tomak molok hakle’an investigasaun.
Komisáriu Adjuntu CAC, Alvaro Maria Freitas, hateten, inisiativa ne’e tanba hetan keixa katak mosu irregularidade. Tanba ne’e, molok halo investigasaun CAC sei halo despaisu atu halo uluk verifikasaun dadus.
“Ha’u hatún ona despaisu bá kraik no despaisu ida-ne’e orbainhira ita ko’alia kona-ba merenda eskolár, ne’ebé agora despaisu tun ona no sei iha serbisu ida iha atividade ida-ne’ebé mak ita-nia investigadór sira sei tun bá terrenu hodi ba verifika kona-ba menu sira ba merenda eskolár,” Komisáriu Adjuntu CAC hato’o ba jornalista sira iha ninia knaar fatin, Farol, Tersa ne’e.
Notísia relevante : Governu hametin supervizaun ba merenda eskolár no seguransa ai-han
Ekipa investigadór halo verifikasaun dadus merenda eskolár, liuliu ba menu ne’ebé empreza responsável fornese ba estudante sira.
“Serake menu ne’ebé mak rekomenda husi Ministériu Edukasaun ne’e empreza sira ne’ebé fornesedór ai-han ba merende eskolár ne’e halo tuir orientasaun,” Komisáriu kestiona.
Nia dehan, presiza halo verifikasaun menu hodi konfirma tuir kuantidade no kontein nutritivu.
“Iha menu ne’e na’an karau no na’an fahi, ezemplu iha menu ne’e na’an kuantidade oinsá, labele dehan tau de’it na’an maibé na’an sira tau ne’e oinsá, se oituan ne’e labele tanba labarik aban bainrua nia nutrisaun ne’e oinsá. Tanba ne’e, ami husu ona manuál menu merenda eskolár ba Ministériu Edukasaun atu fasilita investigasaun,” Komisáriu akresenta.
Maneira verifikasaun dadus ne’ebé CAC uza ba problema merende eskolár ne’e mak sei halo entrevista ho alunu sira, bele hateten sira kada loron han hahan saida de’it.
“Depois kompostu husi saida mós tan tahu ka tempe. Ne’ebé ita lakohi investigasaun ne’e entervista fali Diretór Eskola, ita ba de’it labarik sira, enkuantu labarik ida-ne’ebé mak nia loroloron simu, nia la hetan fali,” nia tenik.
Jornalista : Natalino Costa
Editora : Julia Chatarina
