Defeza husi Juíza Ana Paula keixa Juíz Administradór Dili no Sekretáriu Judisiál
DILI, 20 Outubru 2026 (TATOLI)–Arlindo Dias Sanches no Elizabeth Lopes, hanesan Defeza husi Juíza Ana Paula Fonseca hato’o ona keixa hasoru Juíz Administradór Tribunál Judisiál Primeira Instánsia Dili Yudi Pamungkas no Sekretáriu Judisiál Tribunál Dili Afonsinho da Costa Fernandes ba Ministériu Públiku, Komisaun Antí-Korrupsaun no Prevedoria Direitu Umanu Justisa (PDHJ), iha loron 14 Outubru 2026, tuku 15:00.
Advogadu Privadu Arlindo Sanches, hateten, razaun keixa ne’e tanba tenta halo intervensaun ba servisu Juíza Ana Paula iha sala julgamentu bainhira prezide interrogatóriu dahuluk ba prosesu Nuc. 0053/2026/PGGCC iha loron 19 Setembru 2019.
“Polémika ne’ebé maka ita hotu rona no haree iha dia 19 Setembru 2026, entre Dra. Ana Paula Fonseca Monteiro De Jesus kontra Dr. Yudi Pamunkas, Dr. Afonsinho da Costa Fernandes kona-ba prosesu Nuc. 0053/2026/PGGCC ne’ebé insiste ofisiál atu retira husi sala audiénsia, nune’e mós haruka Juíza Dr. Ana Paula Fonseca Monteiro De Jesus atu labele kontinua ho dilijénsia refere,” nia konta tuir.
Notísia relevante : Juíza Ana Paula deklara iha sala julgamentu lamenta ho desizaun KSMJ
Parte Defeza dehan, kestaun sira ne’e tanba alega Juíza Ana Paula hetan ona transferénsia ba Tribunál Judisiál Primeira instánsia Oekusi.
Nia konsidera katak aktu ne’e rasik iha indikasaun ba intervensaun administrativa ba direitu husi Juíz Administradór Tribunál Judisiál Primeira Instánsia Dili no Sekretáriu Judisiál Afonsinho da Costa Fernandes.
“Ami husu ba mídia atu akompaña nafatin keixa/denúnsi ne’ebé maka ami ba rejistu ona iha Ministériu Públiku iha datada 13 Outubru 2026. Tanba asaun ne’e maka ami konsidera nu’udar Krime Abuzu Puder haktuir artigu 297 kona-ba prosedimentu legál sira no lei sira ne’ebé maka vigór iha Timor-Leste, halo interferénsia ba prosesu no Dr. Yudi Pamungkas halo influénsia ba Dr. Afonsinho da Costa Fernandes ba prosesu Nuc. 0053/2026/PGGCC,” nia katak.
Tuir Arlindo, ida-ne’e hatudu ba públiku katak Adminstradór Sekretáriu Judisiál Tribunál Judisiál Primeira Instánsia Dili laiha kapasidade atu jere Tribunál ho di’ak no profisionál no órgaun ida-ne’ebé maka indepedente no imprasiál para públiku fiar nafatin sistema Judisiál iha Timor-Leste.
Jornalista : Natalino Costa
Editora : Julia Chatarina
