DTK Kovalima arrekada reseita rihun $230 ba Kofre Estadu
KOVALIMA, 20 Outubru 2026 (TATOLI TL)– Diresaun Transporte no Komunikasaun (DTK) Munisípiu Kovalima arrekada reseita $230.065 ba Kofre Estadu, durante períodu Janeiru to’o Setembru 2026.
Diretór DTK Kovalima, Juaquim Gusmão informa katak reseita ne’e aumenta tanba implementasaun taxa foun ne’ebé hahú aplika iha Juñu nia klaran.
“Total reseita ne’ebé arrekada hamutuk $ 198.845 mai husi servisu atendimentu rutina hanesan inspesaun veíkulu no prosesu dokumentu ba sidadaun sira maibé ami mós kontribui reseita mai husi teste karta kondusaun, karta kondusaun ba sidadaun sira kontribui $31.220”, Diretór DTK Kovalima, Juaquim Gusmão, relata informasaun ne’e ba TATOLI iha Bairru-Kosta, Kovalima.
Iha tinan 2025, DTK Kovalima arrekada reseita $117.711 durante períodu Janeiru to’o Dezembru. Nune’e, reseita ne’ebé arrekada iha fulan sia dahuluk tinan 2026 hatudu aumentu kompara ho reseita tinan kotuk.
Iha fatik ketak, Motorista João Amaral, dehan ho politika Governu aumenta taxa ba karreta ho motor ne’e DTK Kovalima kontribui reseita maka’as duni.
” Ita hatene hela DTK Kovalima arrekada reseita maka’as foin mak fulan-sia deit kontribui ona $198,845 no seidauk sura ba fulan Outubru no Dezembru. tanba relasiona politika Governu aumenta taxa bainhira ita ba hamoris dokumentu motorizada no kareta sira selu bazeia ba regra foun ne’ebé aplika”. nia dehan.
Notisia relevante:DNTT sei aplika taxa administrativa foun ba transporte sira iha 10 Juñu
Jornalista: Celestina Teles
Editór: Florencio Miranda Ximenes
