Ipolito Soares: “Biar oinsa, liga nafatin la’o”
DILI, 20 Outubru 2026 (TATOLI)–Prezidente Liga Futebol Timor-Leste (LFTL), Ipolito Soares, responde deklarasaun Prezidente Federasaun Futebol Timor-Leste (FFTL), Nilton Gusmão, ne’ebé deklara katak FFTL laiha kondisaun finanseira atu apoiu Liga Futeból Timor-Leste (LFTL) iha époka ne’e.
Notísia Relevante: FFTL seidauk iha kondisaun fó apoiu finanseiru ba Liga Futeból Timor-Leste
Nia ehan, maske ho limitasaun finanseira ne’ebé FFTL enfrenta, Prezidente LFTL ne’e garante katak organizasaun liga futeból sei kontinua nafatin.
“Biar oinsa, Liga nafatin la’o,” Prezidente Liga Futebol Timor-Leste (LFTL), Ipolito Soares, hateten ba Agência Tatoli iha Dili, ohin.
Ipolito hateten, nia parte agradese tanba durante ne’e FFTL kontinua selu árbitru sira ba jogu sira iha liga.
“Agradese bainhira sira mak selu árbitru ba ami iha liga, agradese,” nia dehan.
Ipolito mos espresa esperansa katak FFTL bele autoriza utilizasaun estádiu ba jogu sira primeira volta nian, atu nune’e kompetisaun bele la’o ho di’ak iha infraestrutura adekuadu.
“Espera FFTL mós bele autoriza estádiu para jogu primeira volta bele halo iha estádiu,” nia hateten.
Anets ne’e, iha loron 17 Outubru 2026, Prezidente FFTL, Nilton Telmo Gusmão dos Santos, deklara katak iha tinan 2026 ne’e FFTL seidauk iha kondisaun atu fó apoiu finanseiru ba Liga Futebol Timor-Leste.
Nia dehan, liga sei bele la’o hela ho apoiu husi Ministériu Juventude Desportu Arte no Kultura (MJDAK), no FFTL fó apoiu morál no apoiu árbitru atu lidera jogu maibé apoiu finanseira seidauk iha kondisaun.
Nia esplika, FFTL labele aloka orsamentu ba Liga tanba federasaun sei iha obrigasaun barak ne’ebé presiza rezolve, relasiona ho dívida ne’ebé estrutura pasadu husik hela. Nia dehan, dívida ne’ebé presiza rezolve hamutuk kuaze $200.000, maibé FFTL rezolve ona $600.000 resin, entaun fundu ne’ebé simu labele aloka hotu ba dezenvolvimentu futeból.
Maske nune’e, Nilton otimista katak iha tinan 2027, FFTL sei iha kondisaun finanseira ne’ebé solidu liu no iha ona kbiit atu apoia atividade liga nian.
Jornalista : Hortêncio Sanchez
Editór : Cancio Ximenes
