Komisaun A iha inisiativa bolu CAC no PGR solusiona avokasaun prosesu justisa
DILI, 20 Outubru 2026 (TATOLI)—Komisaun A iha Parlamentu Nasionál (PN) ne’ebé trata asuntu Konstitusionál no Justisa iha ona planu atu bolu Komisaun Antí-Korrupsaun (CAC) no Prokuradoria Jerál Repúblika (PGR) atu buka solusaun ba avokasaun prosesu justisa.
“Neste momentu laiha delegasaun kompeténsia, maibé horisehik buat hotu ami hato’o ona iha Parlamentu Nasionál no Komisaun A rasik, Prezidente Komisaun A Señór Distintu Deputadu (Natalino) hateten katak iha inisiativa ida bolu Komisáriu Antí Korrupasaun ho nia Adjuntu sira, bolu mós Prokuradór Jerál Repúblika ho mós nia Adjuntu sira para ami tuur iha meza ida para bele rona buat saida mak Komisaun nia preukupasaun,” Komisáriu Adjuntu ba Investigasaun, Alvaro Maria Freitas, hato’o ba jornalista sira iha nia knaar fatin, Faról, Tersa ne’e.
Notísia relevante : Komisáriu CAC informa ona ba PR no PM kona-ba avokasaun prosesu husi PGR
Nia dehan, Komisaun CAC sempre prontu bainhira Komisaun A bolu tanba Komisaun nu’udar reprezentante povu.
“Entaun se liman ain povu ninian, kuandu haree katak instituisaun Estadu sira iha problema ba malu, prontu sira tenke bolu para rona razaun tanba saida no ami disponível kuandu iha konvite, ne’e husi Komisaun ami sempre prontu,” nia akresenta.
Alvaro haktuir, Komisáriu CAC Rui Pereira horsehik iha reuniaun plenária kona-ba Orsamentu Estadu, nune’e Komisáriu abertamente ko’alia katak prontu halo diálogu ho PGR.
“Audiénsia ho Komisaun A ne’e depende bolu atu fulan ida-ne’e ka fulan oin, ne’e depende. Ida-ne’e ha’u labele ko’alia sai, tanba konforme ajenda husi Komisaun, tanba Komisaun A mós trata hela lejizlasaun lubun ida, buat ne’ebé mai ko’alia ho Prezidente Komisaun A horsehik ne’e, nia hateten katak, imi hein de’it depois sei iha konvite ida ba mak ita-boot sira mai,” nia hato’o.
Antes ne’e, Komisáriu Rui Pereira hateten, CAC remete ona kazu korrupsaun 10 ba Ministériu Públiku maibé to’o agora seidauk delega hikas atu kontinua investiga.
Nia dehan, situasaun ne’e desde kedan iha tinan kotuk no agora sedauk solusaun. Tanba kazu korrupsaun barak ne’ebé CAC halo ona averiguasaun besik tinan-ida maibé to’o agora Ministériu Públiku seidauk redelega atu kontinua prosesu.
Jornalista : Natalino Costa
Editora : Julia Chatarina
