SMA Kovalima husu komunidade labele tesi ai no sunu rai arbiru
KOVALIMA, 20 Outubru 2026 (TATOLI TL) – Diretór Servisu Munisipál Agrikultura (SMA) Kovalima, Lino Magno, husu ba komunidade tomak atu labele tesi ai no sunu rai arbiru tanba hahalok ne’e bele estraga ambiente.
SMA Kovalima orienta ona ba funsionáriu sira iha baze atu halo kontrolu maka’as, nune’e evita sidadaun balun sunu rai no tesi ai arbiru.
“Ha’u mós apela ba to’os-na’in sira atu evita sunu rai no tesi ai arbiru tanba ahi bele estraga ai-hun tuan no hamosu impaktu negativu ba ambiente”, Diretór Servisu Munisipál Agrikultura (SMA) Kovalima, Lino Magno, dehan ba TATOLI iha Tabakolot .
Nia dehan impaktu husi tesi ai no sunu rai arbiru la’ós estraga ambiente de’it, maibé mós ameasa saúde, ekonómia no seguransa moris ba komunidade nian. Nune’e, komunidade tenke servisu hamutuk atu proteje floresta, evita sunu rai sein kontrolu no asegura rekursu naturál ba jerasaun ohin no futuru.
Iha sorin seluk, Abitante Celestino Noronha dehan presiza atu kuidadu ai-laran tuan sira labele sunu rai no tesi ai arbiru nune’e labele fó impaktu
“Ita hatene katak dadaun ne’e ita enfrenta mudansa klimatika tanba ita ema nia hahalok nune’e halo volume udan been menus,” katak nia.
Notisia relevante:SEF husu ema hotu uza konxiénsia atu labele sunu rai
Jornalista:Celestina Teles
Editór:Florencio Miranda Ximenes
