Empreza Dingsung hahú instala armazein ba konstrusaun Ponte Sumaku iha Lakluta
VIKEKE, 21 Outubru 2026 (TATOLI)—Empreza Dingsung Internasionál, Unipessoal, Lda hahú instala armazein atu rai ekipamentu no materiál ba konstrusaun foun Ponte Sumaku, iha Suku Uma-Tolu, Postu Administrativu Lakluta, Munisípiu Vikeke.
Xefe Suku Uma-Tolu, Eduardo Soares, informa katak empreza ne’e aprezenta ona karta koñesimentu ba autoridade suku no hahú prepara fatin ba armazein ne’ebé sei uza durante prosesu konstrusaun ponte.
“Kona-ba konstrusaun Ponte Sumaku, Empreza Dingsung Internasionál mai hasoru ha’u no fó sira-nia karta koñesimentu ba suku. Agora sira hahú instala armazein atu rai ekipamentu no materiál konstrusaun ponte,” Eduardo Soares hateten ba TATOLI iha Postu Vikeke Vila, Kuarta ne’e.
Nia esplika katak, to’o agora, empreza sei prepara fatin no harii armazein molok hahú servisu konstrusaun ponte.
“Depoiz armazein ramata, empreza sei lori ekipamentu sira bá fatin konstrusaun hodi hahú servisu. Ha’u haree katak empreza sei hahú konstrusaun iha tinan ida-ne’e,” nia dehan.
Eduardo Soares hateten katak kondisaun Ponte Sumaku ne’ebé estraga ona durante tinan barak sai obstákulu boot ba movimentu komunidade Lakluta, liuliu durante tempu udan, bainhira bee mota sa’e no komunidade labele liu ho seguru.
“Durante tinan hitu nia laran, ami hasoru difikuldade boot tanba Ponte Sumaku ne’ebé estragadu. Bainhira udan no mota sa’e, komunidade labele ultrapasa inklui transporte atu transporta pasiente emerjénsia mós sai difísil. Tanba ne’e, ami agradese ba Governu tanba tau ona atensaun ba ponte ne’e. Ami hein katak bainhira ponte ramata, sei fasilita komunidade nia movimentasaun,” nia hato’o.
Iha parte seluk, Koordenadór Infraestrutura husi Ministériu Obra Públika (MOP) iha Munisípiu Vikeke, Mário Ângelo Menezes, konfirma katak MOP asina ona kontratu ho empreza Dingsung Internasionál atu halo konstrusaun Ponte Sumaku.
“Kona-ba konstrusaun Ponte Sumaku, ita asina ona kontratu ho empreza Dingsung Internasionál, ho númeru SSS/206/MOP-2026 no valór kontratu US$1.534.946,99. Ita mós orienta téknika sira iha munisípiu atu halo supervizaun ba servisu empreza nian,” nia tenik.
Ponte Sumaku sei fó benefísiu ba komunidade iha Postu Administrativu Lakluta, ne’ebé kompostu husi suku haat: Uma-Tolu, Dilór, Ahik no Laline. Tuir dadus ne’ebé disponivel, postu ne’e iha populasaun hamutuk 8.123, ho uma-kain 1.907.
Kontekstu
Ponte Sumaku, ne’ebé lokaliza iha Suku Uma-Tolu, Postu Administrativu Lakluta, estraga ona durante tinan barak tanba udan-boot no bee mota sa’e. Situasaun ne’e difikulta movimentu komunidade, transporte públiku no transferénsia pasiente emerjénsia ba sentru saúde no ospitál iha Munisípiu Vikeke.
Iha 05 Janeiru 2026, TATOLI relata katak Xefe Suku Uma-Tolu, Eduardo Soares, husu Governu liuhosi MOP atu halo konstrusaun foun ba ponte ne’e, tanba kondisaun ponte nian obriga komunidade atu hasoru difikuldade bainhira mota sa’e. Iha tempu udan, transporte sira hasoru difikuldade atu liu, no pasiente emerjénsia sira mós bele hetan obstákulu atu to’o ba fasilidade saúde.
Iha 15 Maiu 2026, TATOLI relata tan katak Ponte Sumaku estraga totál tanba udan-boot, hodi impede komunidade no transporte públiku atu liu. Iha tempu ne’ebá, autoridade suku husu ba MOP atu aselera prosesu konstrusaun ponte ne’e. MOP informa katak proposta konstrusaun ponte nian hetan ona aprovasaun iha Konsellu Administrasaun Fundu Infraestrutura no kontinua ba prosesu aprovizionamentu.
Lee notísia relevante:
- Autoridade Uma-Tolu solisita MOP konstrui ponte Sumaku — TATOLI, 5 Janeiru 2026
- Ponte Sumaku kotu totál, difikulta movimentasaun — TATOLI, 15 Maiu 2026
- Ponte Sumaku kotu difikulta Sentru Saúde Lakluta transfere pasiente ba Vikeke — TATOLI, 9 Maiu 2024
Jornalista: Vitorino Lopes da Costa
Editór: Xisto Freitas da Piedade
