IPK Setembru rejista inflasaun 0,1
DILI, 21 Outubru 2026 (TATOLI) – Índise Presu Konsumidór (IPK) fulan-Setembru 2026 rejista inflasaun 0,1%, kompara ho deflasaun 0,3% iha Agostu 2026.
Téknika INETL, Rosentina Sarmento, esplika katak aumentu presu iha grupu ekipamentu no manutensaun mobiláriu uma-laran, ne’ebé sa’e 1,0%, transporte sa’e 0,3% no alkol no tabaku sa’e 0,1%, kontribui ba inflasaun mensál iha Setembru 2026.
Nia hatete katak grupu hahán no bebida la’ós alkólika tun 0,1%, ne’ebé sai hanesan mudansa kontrária ba inflasaun mensal grupu hotu. Redusaun ne’e akontese liuliu tanba presu foos tun 0,9%. Grupu hahán no bebida la’ós alkoólika tun 0,1% tanba hetan impaktu maioria husi sub grupu foos tun 0,9%.
Maski grupu hahán no bebida la’ós akóliku rejista redusaun 0,1%, subgrupu balun aumentu presu hanesan modo-tahan sa’e 0,4%, masin-midar, marmelada, bani-been, xokolate no hahán midar sa’e 0,5%, bee, bebida, jus ai-fuan sa’e 1,1%, ai-fuan sa’e 1,0%, susubeen, keiju no manu-tolun sa’e 0,4%, ikan no hahán tasi sa’e 0,2% no na’an sa’e 0,1%.
Rosentina mós subliña katak iha komparasaun anuál entre Setembru 2025 no Setembru 2026, IPK tun 0,1%. Redusaun ne’e hetan kontribuisaun husi grupu hahán no bebida la’os alkólika, ne’ebé tun 0,8%, alkol no tabaku tun 0,4%, ekipamentu no manutensaun mobiliáriu uma-laran tun 0,5% no rekreasaun no kultura tun 0,6%.
Iha parte seluk, grupu transporte rejista aumentu 6,5%, hatais no sapatu 1,3%, edukasaun 0,3% no komunikasaun 0,3%. Aumentu sira ne’e sai fatór kontráriu ba redusaun IPK anuál iha Setembru 2026.
Nia hatutan katak iha komparasaun mensál entre Agostu no Setembru 2026, presu produtu tradeable tun 0,1%, enkuantu presu non-tradeable sa’e 0,4%.
Entretantu, iha komparasaun anuál entre Setembru 2025 no Setembru 2026, presu produtu tradeable la rejista mudansa (0,0%), enkuantu presu produtu non-tradeable tun 0,4%.
Notísia relevante: INE-TL rejista deflasaun 0,3% iha Agostu 2026
Jornalista: Arminda Fonseca
Editora: Maria Auxiliadora
