Komandu PNTL komprometidu haforsa rekursu iha UPF
DILI, 21 Outubru 2026 (TATOLI)–Komandante Jerál Polísia Nasionál Timor-Leste (PNTL), Komisáriu Asistente Polísia Afonso dos Santos, komprometidu haforsa rekursu iha Unidade Patrullamentu Fronteira (UPF).
“Rekrutamentu ida -e’e importante, agora membru UPF ne’e mak laiha duni, la’ós menus lae, mak ita haree. Rekrutamentu ne’e ita fó prioridade duni ba UPF sira, ita tenke prepara. Agora sira katuas hotu ona ne’e, ita husik de’it sira ga! kuitadu balun nehan monu hotu ona,” hateten Komisáriu Afonso iha Kuartél Jerál PNTL, Kaikoli, Kuarta ne’e.
Notísia relevante : Empreza sei entrega Postu UPF unidade 50 iha Fevereiru 2026
Nia dehan, iha kestaun seguransa fronteira kontroladu maibé Komandu nia responsablidade mak kontinua haree no prepara rekursu sira tanba seguransa iha fronteira ne’e tenke di’ak.
Daudaun ne’e membru UPF ativu hamutuk 363, kompostu husi feto 16 no mane 347.
UFP ho nia serbisu mak patrullamentu no vijilánsia iha fronteira territoriál sira, no iha koordenasaun no kooperasaun ho parte interesada sira seluk, espesialmente ho FALINTIL-Forsa Defeza Timor-Leste (F-FDTL). Kontrola movimentu ema no sasán sira iha fronteira territoriál, ho koordenasaun no kooperasaun ho Servisu Imigrasaun no Alfándega.
Unidade ne’e koopera ho autoridade administrativa relevante sira seluk tuir lejizlasaun fiskál, aduaneira no sanitaria. Atu aplika lei sira relasiona ho tráfiku umanu, tráfiku droga ilegál, tráfiku kilat no atividade kriminál organizadu sira seluk.
Aleinde ne’e, fó seguransa iha Aeroportu hodi hala’o patrulla haleu pista, terminál no aeroportu ho kooperasaun hamutuk ho parte interesada sira seluk no knaar lejítimu sira seluk, tuir nia misaun.
Jornalista : Natalino Costa
Editora : Julia Chatarina
