Komisaun Rekrutamentu finaliza teste eskrita ba aplikante vaga membru PNTL foun
DILI, 21 Outubru 2026 (TATOLI)—Komisaun Rekrutamentu no Juri ba Rekrutamentu Vaga Membru Polísia Nasionál Timor-Leste (PNTL) iha Tersa (20/10) finaliza ona teste eskrita ba aplikante 11.391.
Komandante Jerál PNTL, Komisáriu Jerál Polísia Afonso dos Santos, deklara mantein ho nia prinsípiu katak prosesu rekrutamentu la’o ho di’ak.
“Rekrutamentu ida-ne’e rekrutamentu ida que di’ak, la’ós ko’alia de’it laiha, bá loos mai loos. Ha’u mantein nafatin ha’u-nia kompromisu katak rekrutamentu ne’e tenke la’o di’ak, ne’e mak dehan Polísia Nasionál Timor-Leste, naun eziste familiarizmu, Polísia ida-ne’ebé mak liu ida-ne’e mak loos, se la to’o muda,” Komisáriu Asistente Polísia Afonso dos Santos hateten ba Jornalista sira iha nia knaar fatin, Komandu Jerál Kaikoli, Kuarta ne’e.
Notísia relevante : Kandidatu 11.391 membru PNTL sei tuir teste iha loron 08 Outubru
Komisaun Rekrutamentu informa ona rezultadu prelemináriu antes ne’e bá Komandante Jerál.
“Agora sira informa mai ha’u, ita foti rezultadu sira-nia (kandidatu sira) ezame ne’e ho valór teste eskrita atinje 67, se la to’o bele hatun oituan para sira bele liu hotu,” nia akresenta.
Iha fatin hanesan, Prezidente Juri ba Rekrutamentu, Komisáriu Asistente Polísia José Soares, hateten, Komisaun Rekrutamentu finaliza ona prova kulturál nune’e rezultadu sei hato’o ba Komandante Jerál PNTL no sei submete ba Ministru Interiór hodi foti desizaun.
Maski nune’e, parte Komisaun seidauk bele relata rezultadu loloos tanba sei verifika hela dadus totál hafoin ida-ne’e mak sei relata ba públiku.
Jornalista : Natalino Costa
Editora : Julia Chatarina
