MKI prevee rihun $400-resin halo DED ba merkadu munisipál haat
DILI, 21 Outubru 2026 (TATOLI)-Ministériu Komérsiu no Indústria (MKI) kontinua halo Dezeñu Enjeñaria Detallu (DED) ba merkadu munispál haat foun, hanesan Bobonaru, Manufahi, Ainaru no Kovalima, ne’ebé tuir planu sei halo konstrusaun iha tinan oin.
Diretór-Jerál Komérsiu MKI, Elias de Jesus, hatete progresu estudu viabilidade no dezeñu detalladu ne’e la’o hamutuk no iha tinan ne’e ramata. Tuir planu, iha tinan oin lansa ba konstrusaun projetu.
“Orsamentu ne’ebé ita prevee ba Dezeñu Enjeñaria Detallu ba munisipiu haat ne’e hamutuk $418.190, ne’ebé kaer husi empreza PT Pillar Pusaka Inti Engineering and Management Consultant”, Elias de Jesus hatete ba Tatoli, ohin.
Nia dehan Governu nafatin halo esforsu hodi fornese infraestrutura modernu ne’ebé kumpre padraun di’ak liu kona-ba ijiene, no seguransa ba komersiante no vendedór sira, hodi promove komérsiu ba produtu lokál no hamenus taxa ki’ak komunidade nia laran.
Antes ne’e, Govemu lansa ona konstrusaun Merkadu Munisipál Ermera, Baukau no Lautein, ne’ebé tuir relatóriu depoizde lansamentu, to’o fulan-Setembru 2026 progresu konstrusaun merkadu iha Baukau atinje 3,958%, Ermera 8,2% no Lautein iha prosesu hamoos fatin no mobilizasaun ekipamentu.
“Porsentu sei ki’ik, tanba depoizde lansamentu halo preparasaun hanesan hamoos fatin, mobilizasaun ekipamentu”, nia dehan.
Lembra katak lansamentu ba kontrusaun Merkadu Munisipál Emera iha loron 06 Fevereiru 2026 ho totál orsamentu millaun $8,8-resin ho durasaun tinan ida ho balun.
Ba Merkadu Munispál Baukau lansa iha loron 12 Fevereiru 2026, ho totál orsamentu millaun $7 resin no nia durasaun tinan rua. Ba Merkadu Munisipál Lautein lansa iha loron 28 Agostu 2026 ho totál orsamentu millaun $7-resin ho durasaun tinan rua.
Notísia relevante: MKI halo estudu ba rai hodi prepara ba konstrusaun Merkadu Munisipál Bobonaru
Jornalista: Arminda Fonseca
Editora: Maria Auxiliadora
