Aplikante 500-resin admitidu iha vaga membru PNTL, lista sei taka iha semana oin
DILI, 22 Outubru 2026 (TATOLI)—Prezidente Komisaun Rekrutamentu no Juri ba vaga membru Polísia Nasionál Timor-Leste (PNTL) foun, Komisáriu Asistente Polísia José Soares, informa, Komisaun Funsaun Públika (KFP) entrega ona lista aplikante 500-resin admitidu iha vaga membru PNTL.
“Prova kulturál hotu ona, horisehik rezultadu prova kulturál nian Komisaun Funsaun Públika entrega ona ba ami, ami sei halo imprime, ami sei taka iha Eskudra sira iha munisípiu sira, sé mak pasa iha faze teste kultura nia sei kontinua no ida-ne’ebé mak la pasa sei elimina. Depois ha’u sei fó informasaun detallu hira mak pasa no hira mak la pasa, maibé atu dehan katak sim kandidatu sira ne’ebé pasa iha prova kulturál ne’e iha ema na’in-500-resin,” Prezidente Komisaun Rekrutamentu no Juri, Komisáriu Asistente Polísia José Soares, hato’o ba jornalista sira iha Komandu Jerál PNTL, Kaikoli, Kinta ne’e.
Notísia relevante : Aplikante vaga PNTL la submetidu ba prova médiku hahú hato’o reklamasaun
Nia dehan, Komisaun iha semana oin sei taka naran aplikante admitidu iha faze prova kulturál hamutuk ho lista aplikante sira ne’ebé molok ne’e liu ona teste psikolojia.
Komisáriu Asistente Polísia José Carlos dehan, daudaun ne’e, Komisaun hahú halo ona relatóriu rezultadu prova kulturál ne’ebé konklui ona iha Segunda (17/10).
Iha prazu loron-10 nia laran para Komisaun prepara relatóriu molok hato’o ba Komandante Jerál PNTL no enkamiña ba Ministru Interiór atu foti desizauun.
José Carlos fundamenta katak, relatóriu ne’e sei ko’alia kona-ba situasaun sira liga ho rekrutamentu vaga membru PNTL foun, liliu teste kulturál ne’ebé ramata ona no la tuir númeru 750 ne’ebé Governu defende iha rekrutamentu.
Prazu ba halo relatóriu ne’e komisaun halo hahu husi loron ne’ebé prova kulturál termina.
Jornalista : Natalino Costa
Editora : Julia Chatarina
