MESSK prevee millaun $1,5 apoiu universidade privadu sira iha tinan oin
DILI, 22 Outubru 2026 (TATOLI)–Ministériu Ensinu Superiór Siénsia no Kultura (MESSK) prevee millaun $1,5 iha proposta Orsamentu Jerál Estadu (OJE) 2027 hodi fó apoiu ba universidade privadu sira iha Timor-Leste.
Vise Primeiru-Ministru ba Asuntu Sosiál no Ministru interinu Ensinu Superiór Siénsia no Kultura, Mariano Asanami Sabino, hateten, apoiu ne’e ho objetivu hodi hasa’e kualidade universidade privadu sira tuir padraun ne’ebé iha, liuliu introdusaun aula dijitál ne’ebé utiliza Intelejiénsia Artifisiál (IA) no seluk tan.
“Ho apoiu sira ne’e atu orienta mós polítika foun, ba oin ensinu tenke uza ona lian inglés no portugés hodi hanorin estudante sira. Tanba ita tama ona ba ASEAN, maibé portugés hanesan ita-nia lian ofisiál,” Ministru interinu hato’o hafoin ramata audiénsia públika ho Komisaun G ne’ebé trata asuntu Edukasaun, Juventude Desportu, Kultura no Sidadania, iha Parlamentu Nasionál, Kinta ne’e.
Notísia relevante : Komisaun G husu hametin kooperasaun ho Universidade Lisboa ba dezenvolvimentu rekursu umanu
Tuir dokumentu livru orsamentál ba tinan 2027 MESSK prevee $5.713.653 hodi aloka ba saláriu no vensimentu $3.141.797, bens no servisu $1.071.856, transferénsia públika $1.500.000 hodi finansia programa funsionamentu no dezenvolvimentu instituisionál ho nia sub-programa haat hanesan funsionamentu no dezenvolvimentu instituisionál, dezenvolvimentu instituisionál, parseira, dezenvolvimentu infraestrutura.
Programa ensinu superiór ho sub-programa ida mak hanesan sistema koordenasaun no garantia kualidade ensinu superiór.
Prezidente Komisaun G, Armando Lopes, iha biban ne’e fó apoiu tomak ba programa ministériu nian atu kontinua fó apoiu ba universidade sira.
Jornalista : Nelson de Sousa
Editora : Julia Chatarina
