Sorumutu entre PR Horta no MD Austrália, Destaka kestaun estratéjika oioin

DILI, 22 Outubru 2026 (TATOLI) –Xefe Estadu, José Ramos-Horta, kinta ne’e, simu vizita kortezia husi Vise Primeiru-Ministru no Ministru Defeza Austrália, Richard Marles.

Hafoin enkontru, Richard Marles, hatete previléjiu boot ida ba nia hasoru malu Prezidente José Ramos-Horta, ne’ebé mak belun boot ida ba Austrália no mós belun boot ida ba relasaun entre Austrália no Timor-Leste.

“Vizita ida-ne’e la’o di’ak tebes. Horiseik, hamutuk ho Primeiru-Ministru Xanana Gusmão, ami asina kuadru kooperasaun defeza, ne’ebé mak akordu istóriku ida entre nasaun rua. Akordu ne’e loke dalan foun ba forsa defeza husi nasaun rua atu bele serbisu hamutuk no hametin relasaun nasaun rua ne’e”, Ministru defeza Australianu ne’e dehan.

Tuir nia, Austrália iha esperansa boot katak iha tempu besik mai, bele hahú diálogu kona-ba kooperasaun defeza, atu haree oinsá mak bele hametin relasaun defeza entre nasaun rua ho kontéudu no kolaborasaun konkretu.

“Iha tinan oin mai, ami hein ho interrese atu hala’o ezersísiu Hari’i hamutuk, ne’ebé hala’o ona durante tinan-15. Ezersísiu ne’e envolve nasaun oioin, maibé foku prinsipál iha kooperasaun entre Forsa Defeza Austrália no Forsa Defeza Timor-Leste, iha área hotu-hotu. Área hirak-ne’e inklui infantária, nodezenvolvimentu kapasidade marrítima”, nia hatete.

Serbisu hamutuk iha área rua

Governante australianu ne’e esplika, sira mós sei haree oinsá atu servisu hamutuk iha área intelejénsia no seguransa sibernétika. “Ami hakarak dezenvolve no hametin relasaun entre forsa defeza rua”.

Membru ezekutivu ne’e haktuir horiseik, sira mós anunsia pakote apoiu importante ida ho valor millaun $62 dólar Aaustralianu durante tinan lima, nu’udar parte husi parseria ne’ebé Primeiru-Ministru sira husi nasaun rua asina iha fulan-Janeiru tinan ida-ne’e.

Nia subliña apoiu ne’e sei fó kontribuisaun importante ba Polísia Nasionál Timor-Leste, liuliu atu hametin kapasidade marrítima, forénsika dijitál, seguransa sibernétika no preparasaun ba dezastre.

“Ami kontente tebes bele halo anúnsiu ida-ne’e. Dadeer ida-ne’e, ha’u mós partisipa iha serimónia abertura sentru operasaun foun ba Polísia Nasionál Timor-Leste, iha Dili. Instalasaun ne’e di’ak tebes, no ha’u sente onra boot atu bele haree rasik fasilidade ne’e. Vizita ne’ebé ami hala’o durante loron rua ikus ne’e hatudu katak relasaun entre nasaun rua besik tebes”, nia tenik.

Tuir nia, ba Austrália, Timor-Leste mak parseiru estratéjiku ida-ne’ebé importante tebes.

“Ita mak nasaun viziñu. Ita fahe fronteira marrítima. Jeografia no istória komún ne’e halo ita iha destinu no futuru ne’ebé fahe hamutuk. Ami hein ho entuziazmu atu servisu hamutuk hodi halo futuru ne’e sai realidade”, hatete.

Kona-ba apoiu fó ró patrulla foun

Ministru Defeza esplika, ida-ne’e nu’udar parte husi pakote apoiu ho valór millaun $62 dólares australianu, Austrália sei fó ró tolu ba Polísia Nasionál Timor-Leste.

Ró hirak-ne’e sei fó kapasidade ba polísia atu hala’o patrullamentu lalais iha área tasi Timór. Ró ne’e mak tipu ró inflável ho kapasidade boot liu, ne’ebé iha lian Inglés bolu Rigid Inflatable Boat (RIB).

Nia esplika ró hirak-ne’e fasil atu uza no sei aumenta signifikativamente kapasidade polísia atu hala’o operasaun marrítima.

“Ami sei kontinua servisu hamutuk ho Polísia Nasionál Timor-Leste, liuhusi parseria ne’e, atu asegura katak formasaun hotu ne’ebé presiza iha ona atu opera no mantein ró hirak-ne’e”, líder ne’e dehan.

Notísia relevante:Austrália empeñada apoiu Timor-Leste hasoru krime transnasionál  

Jornalista: Arminda Fonseca

Editór: Rafael Ximenes de A. Belo