Austrália empeñada apoiu Timor-Leste hasoru krime transnasionál
DILI, 22 Outubru 2026 (TATOLI) –Governu Austrália empeñadu atu nafatin apoia Timor-Leste hodi hasoru krime transnasionál iha nasaun ne’e.
Vise Primeiru-Ministru no Ministru Defeza Austrália, Richard Marles, informa, relasiona krime transnasionál ne’ebé akontese iha Timor-Leste, Governu Austrália haree katak krime transnasionál nu’udar dezafiu boot ida-ne’ebé Timor-Leste hasoru.
Maibé tuir nia, krime ida-ne’e la’ós de’it dezafiu boot ba Timor-Leste de’it, maibé krime ne’e mós sai dezafiu ba rejiaun Sudeste Aziátiku no rejiaun Pasífiku.
“Tanba ne’e, importante tebes atu dezenvolve kapasidade Polísia no Forsa Defeza, hodi sira bele kombate krime transnasionál ho efetivu. Atu halo ida-ne’e, presiza iha kapasidade konkretu, inklui ró no pesoál ne’ebé iha abilidade atu hala’o knaar ne’ebé presiza”, Richard Marles, hatete iha Palásiu Prezidénsial Bairru-Pité Dili, kinta ne’e.
Notísia relevante:Austrália-TL diskute kona-ba kombate peska illegál no krime transnasionál
Governante australianu ne’e esplika, relasiona situsaun ne’e, presiza mós fahe informasaun intelijénsia, halo koordenasaun no hametin relasaun entre instituisaun sira.
“Ami hakarak asegura katak kooperasaun entre forsa Polísia no forsa Defeza husi nasaun rua ne’e bele atinji nível ne’ebé di’ak liu, atu ita bele halo buat hotu ne’ebé posível hodi enfrenta krime transnasionál”,Richard Marles hatete.
Dirijente ne’e haree katak krime transnasionál ne’e sai dezafiu ne’ebé aumenta iha rejiaun Sudeste Aziátiku no rejiaun Pasífiku. Ida-ne’e mak dezafiu komún ida-ne’ebé tenke servisu hamutuk atu rezolve.
“Austrália no Timor-Leste iha kompromisu boot atu enfrenta problema ida-ne’e hamutuk”, nia konklui.
Notísia relevante:Governu kontinua esforsu hodi kombate krime transnasionál iha TL
Jornalista: Arminda Fonseca
Editór: Rafael Ximenes de A. Belo
