Komisaun Rekrutamentu Juíz STJ no TR rejeita informasaun lista sombra
DILI, 23 Outubru 2026 (TATOLI)—Prezidente Komisaun Rekutamentu no Selesaun ba Juíz Supremu Tribunál Justisa (STJ) no Tribunál Rekursu (TR), Avelino Coelho, rejeita informasaun kona-ba lista sombra ne’ebé mak la’o iha rede sosiál Facebook, Juíza Maria Natercia eleitu sai Prezidente STJ.
“Konkursu ne’e foin to’o iha faze eskrita, seidauk hakat tama ba ezeme ou entrevista profisionál, halo nusa mak ema ne’e bele hatene ona ida-ne’e mak Prezidente Supremu Tribunál Justisa, ida-ne’e mak Vise, ne’e kerdizer viola regra prosedimentu ne’e rasik,” Avelino Coelho hateten ba Jornalista sira iha STJ, Kolmera, Sesta ne’e.
Nia konsidera, lista ne’e nu’udar lista propaganda, tanba ne’e Komisaun iha dever no obrigasaun atu klarifika buat ne’ebé laloos.
Semana balun tan mak foin hahú ezame no entrevista profisionál, nune’e juri sei fó kada aplikante minutu 30 no sei fó tempu loron-15 ba aplikante la aptu hodi hato’o reklamasaun.
“Komisaun mós laiha kbiit atu nomea ema ne’e ba Juíz konselleiru ka ba Juíz dezembargadór, la’ós Komisaun nia kompeténsia. Komisaun remete relatóriu ba Prezidente Repúblika, relatóriu ba Prezidente Parlamentu Nasionál, ba Governu no importante liu ba Konsellu Superiór Majistratura Judisiál nia mak iha kompeténsia atu nomea, la’ós Prezidente Parlamentu, la’ós Primeiru Ministru,” nia akresenta.
Notísia relevante : Afonso Carmona inklui konkorrente 20 pasa iha teste eskrita vaga STJ
Prezidente Komisaun esplika, la’os Pezidente Repúblika mak nomea Juíz sira, Prezidente iha kompeténsia atu nomea Prezidente Supremu Tribunál Justisa tuir mandatu Konstitusaun.
“Purtantu ida-ne’e mak ho baze ba kestaun jurídika, ita hotu hakruuk ba lei, ita mós hakruuk ba mekanizmu ne’ebá mak Parlamentu kria. Tanba ne’e mak ohin ha’u bolu alin sira (Jornalista) mai atu haloos, ita-nia sosiedade labele moris iha isu sira hanesan ne’e, labele moris ho rumoris tanba rumoris ne’e bele estraga ema-nia naran, ida-ne’e bele alastra bá-mai hodi estraga prosesu ne’e tomak,” nia tenik.
Iha fatin hanesan, Komisária ba Komisaun Rekrutamentu Juíz STJ, Carmelita Caetano Moniz, hateten, husi aplikante 32, iha 21 mak aptu kompostu husi Juíz na’in-17, Jurista rekoñesidu méritu na’in-tolu no Prokuradór Repúblika na’in-ida.
Enkuantu, vaga Juíz foun ba TR iha ema na’in-22 mak konkorre, husi ne’e Juíz na’in-17 mak aptu no iha Juíz na’in-lima mak la aptu.
“Sei iha tempu 15 dias atu halo reklamasaun, husi sira hahu simu notifiksaun. Ita-boot sira haree taka iha sentru Formsaun Jurídiku Judisiáriu iha dia 19 Outubru 2026 konta husi ne’e, nune’e sira iha 15 dias para atu sira halo reklamasaun ba lista ida-ne’e,” nia afirma.
Nune’e mós, Komisáriu José Pedro Camões, informa, juri sira manda rezultadu ba aplikante sira-nia email idaidak.
“Reklamasaun mós kandidatu sira manda hotu ba juri. Sira halo komunikasaun direta no ami (Komisaun) laiha informasaun sobre saida mak sira reklama, kontíudu saida mak sira reklama ho resposta saida mak juri fó,” nia hato’o.
Jornalista : Natalino Costa
Editora : Julia Chatarina
