Ahi-suar husi Indonézia previstu afeta Timor-Leste to’o kuarta-feira
DILI, 24 Outubru 2026 (TATOLI)-Diresaun Nasionál meteorolijia no Jeofízika (DNMG, sigla portugés) alerta ba públiku katak nafatin kuidadu an tanba posibilidade hahú iha domingu (25/10) kualidade ár foun ka ahi-suar sei tama iha illa Timor-Leste.
Tuir previzaun husi DNMG, ahi-suar foun ne’e husi atividade sunu rai iha Papua Osidentál, Indonézia, no análize katak kondisaun ahi suar sei kontinua to’o kuarta-feira, loron 28 Outubru, iha ne’ebe posivelmente sei afeta negativamente ba kualidade ár no hamenus vizibilidade kuaze iha territoriu Timór laran tomak.
Kondisaun ne’e previstu katak sei komesa diak fali husi loron kinta-feira, 29 Outubru, durante períodu loraik ba inísiu kalan.
DNMG sei kontinua monitoriza evolusaun kondisaun meteorolójika no fó informasaun atualizada bainhira iha mudansa signifikativa ruma.
“Ho nune’e, DNMG rekomenda ba publiku atu evita atividade fízika iha ár livre, liuliu iha períodu ahi-suar barak, uza máskara filtrante adekuada N95, taka odamatan no janela bainhira ahi-suar barak”, alerta husi DNMG.
Aleinde ne’e, husu atensaun ba ema ho vulneravel sira, liuliu labarik, idozu, inan isin-rua no ema moras respiratória no kardiovaskular.
“DNMG husu públiku buka asisténsia medika, bainhira sente sintoma sira hanesan dada i’is susar, irritasaun matan no seluk tan”, nota ne’e hato’o.
Notísia relevante: Kualidade ár iha Dili tama hikas ba kategoria la saudavel
Jornalista: Arminda Fonseca
Editora: Maria Auxiliadora
