Empreza konstrui ona kampa 600 iha Jardín Eroi Manu Kaitete
BOBONARU, 26 Outubru 2026 (TATOLI) – Empreza Celijo Star Unipessoal Lda., konstrui ona kampa 600 iha Jardín Erois Manu Kaitete, suku Manapa, postu administrativu Kailaku, munisípiu Bobonaru.
Asistente Enjeñeiru husi empreza konstrutora,Manuel Ramos Madeira, informa katak serbisu fizíku hahú implementa iha fulan-Maiu no daudaun ne’e atinje ona 50%.
“Totál kampa ne’e 774. Agora implementa ona kolom ne’e iha 600, hela 174. Ida-ne’e mak ami seihalo hela”, nia hatete ba Tatoli, iha fatin konstrusaun, ohin.
Ramos relata katak kompañia garante sei finaliza obra ne’e tuir kontratu iha fulan-Dezembru. “Iha parte klima nia mak afeta mai ami nia serbisu, hanesan rai mak manas liu, maibé buat hotu di’ak, tanba materiál lokál no fabrikadu preparadu, depois xefe suku no komunidade iha ne’e apoia”, nia dehan.
Komunidade Rui Afonso da Costa dehan projetu ne’e halo atu haloot restu mortál eroi sira ne’ebé sakrifika vida ba luta libertasaun pátria hodi fó onra no fatin dignu ba sira.
“Sira ne’e mak uluk luta defende ukun-an, sira tenke haloot iha fatin hanesan duni, tanba durante ne’e ita rai iha Osuáriu Odomau, balu rai iha Malilait, tau iha uma ki’ik-oan, la dignu ida. Balun kaixaun no bandeira sira mós atu la di’ak ona, maibé agora Governu halo ona fatin ida-ne’e, ita fó onra tebes ba sira-nia luta. Hanesan uma ida karik di’ak no merese duni sira atu hela”, nia dehan.
Obra ne’e kompañia Celijo Star ezekuta ho valór kontratu $874.483,40.
Notísia relevante: Restu mortál kuaze rihun-10 iha ossoáriu munisipál seidauk haloot
Jornalista: Sergio da Cruz
Editora: Maria Auxiliadora
