Janeiru-Setembru, SERVE kontribui reseita $650.722 ba kofre Estadu
DILI, 27 Outubru 2026 (TATOLI)—Servisu Rejistu no Verifikasaun Emprezariál, Institutu Públiku (SERVE, I.P) rekolla reseita hahú husi fulan-Janeiru to’o Setembru 2026 hamutuk $650,722.75 hodi kontribui ba kofre Estadu.
Diretór Ezekutivu SERVE, I.P, Fausto Soares Dias, informa reseita ne’ebé sira rekolla kobre husi atividade rejistu no verifikasaun emprezariál nian husi sukursál 11 inklui Dili, maibé RAEOA nian nafatin kontribui iha sira-nia rejiaun administrativa.
“Iha sukursál Aileu hahú husi fulan-Janeiru to’o Setembru sira konsege rekolla reseita hamutuk $7,496.00, sukursál Ainaru hamutuk $8.121,00, iha Baukau hamutuk $26.817,00,” Diretór ne’e relata ba Agência Tatoli iha nia kna’ar fatin Matadoru, ohin.
Dirijente ne’e hatutan, iha fali sukursál Bobonaru kobre reseita hamutuk $20.122,00, Kovalima hamutuk $19.237,00, Dili hamutuk $476.890,75 no sukursál Ermera hamutuk $14.555,00.
Sukursál Lautein hamutuk $20.852,00, Líkisa hamutuk $12.509,00, Manatutu hamutuk $11.857.00, Manufahi hamutuk $14.782.00, no Vikeke hamutuk $17.484,00, kona-ba RAEOA la inklui iha nasionál maibé sira-nia reseita kontribui ba konta rejiaun administrativa hamutuk $10.468,00.
Nia esplika. katak husi reseita ne’ebé iha sukursál ne’ebé kontribui maka’as ba kofre Estadu mak husi Munisípiu Dili (nasionál) tanba atividade ekonomia barak mak konsentra hotu iha kapitál Dili.
Ezekusaun OJE 2026 atinje 77.0%
Aleinde ne’e, nia hatutan kona-ba sira-nia ezekusaun Orsamentu jerál Estadu 2026 nian ba trimestre datolu nian atinje ona 77.0% ho estimasaun orsamentu hamutuk $1.164.965,10, ne’ebé kompostu husi saláriu vensimentu no beins-servisu.
“Iha ezekusaun nian ami laiha difikuldade ruma tanba ami-nia orsamentu la aloka ba kapitál menór maibé aloka de’it ba saláriu vensimentu no beins-servisu,” nia hateten.
Jornalista : Alexandra da Costa
Editór : Cancio Ximenes
