Konferénsia Ministru Justisa CPLP ba dala-XIX iha Dili rezulta deklarasaun rua importante
DILI, 27 Outubru 2026 (TATOLI)—Iha ámbitu Konferénsia Ministru Justisa Komunidade País Lian Portugés (CPLP, sigla portugés) iha Tersa ne’e, konkorda asina akta deklarasaun Dili ne’ebé fó importánsia ba asuntu rua.
“Ohin ami (Membru CPLP) diskute no asina akta ida ita bolu deklarasaun Dili ne’ebé ko’alia oinsá ita atu kombate krime fraude online, tanba ne’e liuhusi Konferénsia nu’udar meiu ida atu fortalese kooperasaun internasionál, liuliu Estadu membru CPLP, nune’e kona-ba krime organizadu fraude online no atividade jogu ilísitu sira. Aleinde ne’e, iha akordu kooperasaun, Estadu membru CPLP sira asina polítika formasaun interkámbiu konsolida institusaun Estadu sira hanesan Ministru Justisa, PCIC, Prokuradór Jerál Repúblika inklui órgaun Polísia Kriminál ne’ebé foti papél importante ba krime fraude online,” Ministru Justisa, Sergio Hornai, hateten ba jornalista sira hafoin Konferénsia iha Salaun Otél Palm Spring, Fatuhada, Tersa ne’e.
Notísia relevante : Timor-Leste organiza konferénsia Ministru Justisa CPLP atu kombate krime organizada
Nia haktuir, iha reuniaun ohin asina mós deklarasaun iha parte dokumentu notariadu ne’ebé hanaran Apostille, nune’e dokumentu ofisiál viável ba uzu iha modalidade iha membru CPLP no iha tempu hanesan iha nasaun kontinente sira seluk hanesan Europa, Amérika, Áfrika no Ázia.
“Ohin ita mós aborda atu fortalese Servisu Rejistu Notariadu. Ohin mós ita rona ema péritu barak, liuliu Dr.Jorge ho abilidade a’as ko’alia kona-ba mobilidade notariadu no ohin nia kontribui hanoin balun hodi diskute ho Estadu membru sira hotu katak mobilidade ne’e sai hanesan asuntu importante tebes atu seguransa ba emisaun dokumentu ofisiál nian para fó oportunidade ba mobilidade ema liga ba dokumentu ofisiál bainhira sira uza halo mobilidade tuir padraun internasionál no nasionál ne’ebé liga ba nia legalidade sira,” nia akresenta.
Governante ne’e dehan, membru sira komprometidu fó vizibilidade ba integrasaun polítika ida-ne’e no akreditasaun iha modalidade hotu, liuliu iha justisa formál no justisa administrativa.
Sergio Hornai hatutan, deklarasaun Dili mós ko’alia kona-ba reforsa lei estruturante sira, liuliu haree kona-ba kualidade lejizlativa sira ne’ebé iha relasionamentu ho jogu ilísitu sira atu fó seguransa ba sidadaun sira-nia direitu sira.
“Ita ko’alia kona-ba fraude ba ema sira ne’ebé tama ba prátika jogu ilegál sira. Seluk mak ita aprezenta planu durante ita-nia Prezidénsia CPLP 2026 to’o 2028, liuliu iha Ministériu Justisa oinsá mak ita bele matrializa hanoin ida-ne’e iha 90 dias, oinsá Sekretariadu CPLP atu haree deklarasaun Dili hodi fó nia kontinuidade,” nia tenik.
Jornalista : Natalino Costa
Editora : Julia Chatarina
