BNDTL sei hetan kapitál sosiál millaun $30 husi Estadu
DILI, 28 Outubru 2026 (TATOLI)-Konsellu Ministru aprova projetu Rezolusaun Governu nian kona-ba realizasaun estabelesimentu kapitál sosiál Banku Nasionál Dezenvolvimentu Timor-Leste, S.A (BNDTL), no autoriza despeza ba prosesu estabelesimentu kapitál sosiál banku nian.
Sekretáriu Estadu Komunikasaun Sosiál, Expedito Dias Ximenes, hatete projetu rezolusaun ne’e aprezenta husi Ministra Finansa, Santina Viegas Cardoso.
Nia esplika rezolusaun ne’e aprova estabelesimentu kapitál sosiál BNDTL nian ho montante millaun $30, ne’ebé sei subskreve intrgralmente husi Estadu. Realizasaun ne’e mós autoriza despeza to’o loron 31 Dezembru 2026, liuhusi verba ne’ebé aloka ona iha Orsamentu Jerál Estadu tinan ida-ne’e.
Tuir Expedito, estabelesimentu kapitál sosiál ne’e sai nu’udar rekizitu préviu atu BNDTL bele husu autorizasaun husi Banku Sentrál Timor-Leste.
BNDTL nia misaun mak atu promove dezenvolvimentu ekonómiku ne’ebé sustentavel no inkluzivu iha Timor-Leste, liuhusi fornese solusaun finansiamentu ne’ebé adekuadu ba empreza no projetu nasionál sira, ho objetivu atu kompleta no reforsa sistema bankáriu komersiál no sistema finanseiru ne’ebé iha.
“Ita hotu hatene Banku Nasionál Dezenvolvimentu mak instituisaun finanseira ne’ebé iha objetivu atu fó apoiu no fasilita asesu ba kréditu ho taxa juro ne’ebé ki’ik, liuliu ba empreza mikro, ki’ik no médiu, atu sira bele dezenvolve sira-nia negósiu”, Expedito Dias Ximenes hatete.
Nia hatutan katak husi montante millaun $30 ne’ebé aloka ba estabelesimentu BNDTL, millaun $25 sei destina ba kapitál BNDTL, enkuantu millaun $5 sei uza atu apoia prosesu rekrutamentu funsionáriu, dezenvolvimentu sistema no harii estrutura nesesária sira atu garante funsionamentu banku nian.
Notísia relevante: Banku Sentrál hein promulgasaun lei atu hahú prosesu estabelesimentu BNDTL
Jornalista: Arminda Fonseca
Editora: Maria Auxiliadora
