CVTL entrega uma temporária sanulu ba família afetada husi rai-halai iha Molop
BOBONARU, 28 Outubru 2026 (TATOLI) – Krús Vermelha Timor-Leste (CVTL, sigla portugés) no Autoridade Munisípiu Bobonaru, Autoridade Protesaun Sivíl, entrega uma temporáriu unidade sanulu, ne’ebé kompleta ho sintina ba família afetada husi rai-halai iha aldeia Molop-Taz, suku Molop, postu administrativu Bobonaru, ne’ebé akontese iha fulan-Abríl liubá.
Prezidente Konsellu Diretivu CVTL Filiál Bobonaru, Gizela Pires, dehan katak apoia uma temporária, intalasaun fasilidade sanitária, kanalizasaun bee-moos no osan ne’e mai husi fundu emerjénsia Krús Vermela Amérika ho totál rihun $31 hanesan esforsu konkretu ida atu responde ba nesesidade fámilia afetada hamutuk família 58, kompostu husi feto 31 no mane 27.
“Rai-halai ne’e fó impaktu boot ba moris família sira ne’ebé afetada, lakon hela-fatin ne’ebé seguru la’ós buat ne’ebé fásil atu enfrenta, tanba uma la’os de’it fatin atu hela no hetan protesaun, maibé mós fatin ba família atu halibur hamutuk, harii fali sira-nia moris, no hala’o atividade loroloron ho seguru”, nia hateten iha intervensaun, kuarta-feira ne’e.
CVTL fiar katak uma temporária no instalasaun sanitária ne’ebé entrega ohin bele fó fatin ne’ebé seguru liu, hadi’a asesu ba saneamentu báziku, no ajuda família sira atu hala’o sira-nia moris loroloron ho di’ak liután.
Alende ne’e, Gizela dehan asisténsia umanitária la’ós de’it kena-ba fornese sasán ka harii uma, maibé mós kona-ba prezerva dignidade umana, hametin esperansa, no ajuda família sira hahú fali sira-nia moris hafoin hetan dezastre.
“Ba família benefisiária sira hotu, ami hein katak uma temporária no fasilidade sira ne’ebé fornese sei uza no mantein ho di’ak. Ami komprende katak, asistensia ida-ne’e karik la nesesariamente natoon hodi hatán ba nesesidade sira hotu ne’ebé la’o daudaun, maibé ami hein katak ida-ne’e sei sai pasu importante ida, iha prosesu rekuperasaun ba familia no komunidade sira”, nia dehan.
Gizela subliña katak CVTL mós enkoraja komunidade tomak atu kontinua hametin espíritu kooperasaun mútua, proteje seguransa ambientál, no hasa’e preparasaun ba risku dezastre sira iha futuru.
“CVTL sei kontinua haka’as-an atu kumpre nia mandatu umanitáriu liuhusi fó prioridade ba nesesidade komunidade afetada husi dezastre no hametin kolaborasaun ho Governu, parseiru sira, no komunidade lokál sira”, nia afirma.
Sekretáriu Autoridade Munisípiu Bobonaru ba Asuntu Planeamentu, Semedo Laco Costa, agradese ba esforsu umanitáriu ne’e no konsidera apoia ne’e ajuda tebes serbisu ne’ebé Governu seidauk responde.
“Autoridade Munisípiu Bobonaru ita seidauk iha kbiit, kuandu dezastre ruma mosu, ita-nia intervensaun halo de’it apoia emerjénsia, depois rekolla dadus submete ba Protesaun Sivíl para fó apoiu rekuperasaun hodi hakmaan situasaun ne’ebé sira hasoru”, nia dehan.
Prezidente APC, Jezuíno dos Reis Matos, konfirma hafoin akontesimentu ekipa entrega apoia emerjénsia no daudaun ne’e prosesu hela ba apoiu rekuperasaun.
“Dadus sira ne’e ha’u aprova ona hein de’it prosesu tuirmai. Se uma ida-ne’e temporáriu entaun sira tenke hetan uma dignu ida ne’eb sira bele halo ho simentu, besi, kalen”, nia dehan.
Oportunidade ne’e, Xefe Suku Molop, António Maia, konsidera tipu uma ne’e maski simples, maibé di’ak no seguru ba familia atu hela hodi aguenta moris.
“Ami nia hanoin uma ne’e hanesan permanente ida, tanba uma ne’e mai pakote ida ho nia harii-fatin, bee-moos, para família sira bele hela, maibé ami mós hein katak APC se fó apoia rekuperasaun”, nia espera.
Tuir rejistu implementasaun atividade, fundu ne’ebé gasta hamutuk $20.980,22. Husi montante ne’e, $17.436,70 uza ona ba asisténsia uma-mahon, WASH (bee, saneamentu no ijiene), no asisténsia osan. Entretantu, $3.543,52 uza ona hodi apoia kustu operasionál no uma ne’e membru komunidade, família no autoridade lokál mak konstrui to’o finaliza.
Jornalista: Sergio da Cruz
Editora:Maria Auxiliadora
