MJDAK apresia atleta Teofilo Freitas konkista medalla prata ba TL

DILI, 28 Outubru 2026 (TATOLI)—Ministériu Juventude, Desportu, Arte no Kultura (MJDAK), liuhusi Diretór-Jerál Desportu, David Tomás de Deus, simu delegasaun para-atleta Timor-Leste no hato’o apresiasaun ba sira-nia partisipasaun iha kompetisaun internasionál.

MJDAK hato’o orgullu espesiál ba atleta Teofilo Freitas, ne’ebé konkista medalla prata iha prova halai metru 1.500, kategoria T38, no lori naran Timor-Leste ba nivel internasionál.

Xefe delegasaun, Aniceto Berlelo, hato’o agradeseimentu ba MJDAK no ekipa tomak ne’ebé fó apoiu no akompaña atleta sira durante partisipasaun iha kompetisaun iha Aichi-Nagoya, Japaun.

“Ami hato’o agradeseimentu ba MJDAK no ekipa tomak ne’ebé fó apoiu no akompaña atleta sira durante partisipasaun iha kompetisaun,” Aniceto Berlelo hateten ba jornalista sira iha Aeroportu Internasionál Nicolau Lobato Dili, tersa ne’e.

Atleta Teofilo Freitas mós hato’o agradeseimentu ba MJDAK no Comité Paralímpico Nacional Timor-Leste (CPNTL) ba apoiu no investimentu ba atleta ho defisiénsia.

“Ha’u hato’o agradesimentu ba MJDAK no CPNTL ba apoiu no investimentu ba atleta ho defisiénsia, ne’ebé kontribui atu ami bele dezenvolve kapasidade no hatudu talentu iha kompetisaun desportiva,” Teofilo hateten.

Nia apela ba entidade kompetente sira atu kontinua fó apoiu no atensaun ba atleta ho defisiénsia, liuliu iha modalidade para-atletizmu no modalidade desportiva seluk, atu sira bele hasa’e tan prestasaun no lori naran Timor-Leste ba susesu iha futuru.

Medalla prata ne’e sai orgullu ba nasaun no inspirasaun ba atleta ho defisiénsia sira atu kontinua luta no atinji rezultadu di’ak liután.

Jornalista : Hortêncio Sanchez

Editór        : Cancio Ximenes