Timor GAP sosa partisipasaun interese empreza Woodside iha projetu Greater Sunrise
DILI, 29 Outubru 2026 (TATOLI) – Primeiru-Ministru, Kay Rala Xanana Gusmão, hasoru malu ho Prezidente Repúblika, José Ramos-Horta, hodi diskute kona-ba progresu setór petróleu.
“Ha’u informa ba Prezidente katak Timor Gás no Petróleu, Empreza Públika (Timor GAP, E.P), sosa partisipasaun interese empreza petrolífera Woodside nian iha Projetu Greater Sunrise,” Xanana hateten.
Nia dehan, informasaun klaru Ministru Petróleu Rekursu Minerál (MPRM) mak sei hato’o direta ba Prezidente Repúblika iha tempu besik.
Rekorda fali katak, Asinatura akordu sosa partisipasaun ne’e realiza iha Faról, Dili foin lalais ne’e entre Prezidente Konsellu Administrasaun Timor GAP, Rui Maria Alves, no Vise-Prezidente Ezekutiva Dezenvolvimentu Tékniku no Enerjia Woodside, Julie Fallon, ho sasin hosi Ministru Petróleu no Rekursu Minerál, Francisco Monteiro.
Hafoin asinatura, Timor GAP anunsia liuhusi konferénsia imprensa iha Otél Timor, kona-ba akordu kompra no venda ho Woodside Energy Ltd., ne’ebé Timor GAP sosa asaun tomak iha kampu Greater Sunrise, iha Tasi Timor.
Transasaun ne’e kobre área arrendamentu retensaun NT/RL2, NT/RL4, no akordu partilla produsaun PSC JPDA 03-19 no JPDA 03-20.
Prezidente Konsellu Administrasaun Timor GAP esplika, bainhira kompletu, Timor GAP sei asegura 100% partisipasaun interese tomak iha Projetu Greater Sunrise, ho valór tranzasaun totál millaun $200.
Pagamentu sei halo tuir etapa mak millaun $13,71 sei selu bainhira projetu kompletu, millaun $11,29 sei selu iha prazu loron 30 hafoin deklarasaun Final Investment Decision (FID), no millaun $175 sei selu iha prazu loron 365 hahú husi loron kargu primeiru gás naturál likífeitu LNG nian ne’ebé sei fa’an ba konsumidór.
Timor GAP konsidera tranzasaun ne’e refleta kompromisu ba dezenvolvimentu kampu Greater Sunrise ho ordenadu no rápidu, hafoin Tratadu Fronteira Marítima entre Timor-Leste no Austrália vigora, hodi konsolida pose no hatuur kompañia iha prosesu aselerasaun kampu refere liuhosi pipeline mai Natarbora, iha kosta súl Timor-Leste.
Akizisaun ne’e konsidera pasu signifikante, ne’ebé sei fó pozisaun forte ba Timor GAP atu aselera dezenvolvimentu Greater Sunrise no selesiona konseitu Timor LNG, hodi lori aspirasaun naruk tinan nian ba dezenvolvimentu Greater Sunrise iha kosta súl.
Greater Sunrise reprezenta dezenvolvimentu aas husi rekursu naturál gás, lokaliza kilómetru 150 husi sudeste Timor-Leste no 450 noroeste husi Darwin. Projetu ne’e sei fornese oportunidade estratéjika hodi transforma kosta súl ba eixu indústria no enerjia, kria postu traballu, dezenvolve negósiu lokál no apoia atividade ekonómika.
Kompletamentu tranzasaun depende ba aprovasaun Governu no kondisaun presedente kustomária, ho objetivu atu ramata iha semestre dahuluk tinan 2027.
Vise-Prezidente Ezekutiva Woodside subliña, tranzasaun ne’e hatudu abordajen dixiplinadu ba jestaun portfóliu, maski rekoñese Greater Sunrise hanesan rekursu kualidade aas ne’ebé iha poténsia lori benefísiu ekonómiku ba Timor-Leste. Woodside komprometidu atu serbisu ho espíritu konstrutivu ho Timor GAP, Osaka Gas no Governu rua hodi asegura tranzisaun ordenadu.
Bainhira tranzasaun remata, Woodside sei laiha tan interese iha Sunrise Joint Venture.
Tuir dadus, Timor GAP atualmente iha interese 56,56% iha Sunrise Joint Venture no iha loron 02 Setembru 2026 anunsia ona akordu ho Osaka Gas atu sosa ninia interese 10%.
Jornalista : Hortêncio Sanchez
Wditór : Cancio Ximenes
