UNTL no UNDP hametin ligasaun entre estudante no empregadór liuhusi Feira KarreiraFeira
DILI, 29 Outubru 2026 (TATOLI)—Universidade Nasionál Timor Lorosa’e (UNTL), ho apoiu hosi Programa Nasaun Unida ba Dezenvolvimentu (UNDP-sigla ingleza), organiza Feira Karreira no Edukasaun UNTL atu hametin kooperasaun entre universidade no setór empregu, nune’e estudante no graduadu sira bele asesu ba informasaun no oportunidade karreira.
Reitór UNTL, Joviano António da Costa, hateten katak feira ne’e organiza atu kria ligasaun entre estudante, graduadu no empregadór sira, hodi fasilita sira-nia asesu ba oportunidade empregu iha futuru.
Feira ne’e nia objetivu mak atu fó oportunidade ba estudante no graduadu sira atu hasoru diretamente empregadór, instituisaun no reprezentante kompañia sira, hodi hetan informasaun kona-ba oportunidade servisu no dezenvolve rede profisionál.
“Feira ne’e sai hanesan plataforma ida atu hametin kooperasaun entre universidade no setór empregu, nune’e estudante no graduadu sira bele aumenta sira-nia koñesimentu kona-ba merkadu traballu no prepara an ba mundu servisu,” Reitór Joviano dehan ba TATOLI, iha Kampu Sentrál UNTL, Kinta ne’e.
Liuhusi atividade ne’e, estudante no graduadu sira mós bele estabelese ligasaun ho empregadór sira, troka informasaun no buka oportunidade atu servisu hamutuk iha futuru.
Reitór Joviano esplika katak feira ne’e envolve instituisaun no kompañia sira, inklui empregadór hosi setór oioin, atu partisipa no fahe informasaun kona-ba nesesidade no oportunidade iha merkadu traballu.
Atividade ne’e hala’o iha UNTL durante loron rua, hahú hosi 28 to’o 29 Outubru 2026. Iha feira ne’e, organizadór sira aprezenta produtu lokál, livru, panfletu, ekipamentu eletróniku no seluk tan.
Iha fatin hanesan, Embaixadór Repúblika Koreia, CHANG Ha Yeon, hato’o agradese ba universidade sira, UNDP no Ajénsia Kooperasaun Internasionál Koreia (KOICA-sigla ingleza) tanba organiza feira ne’e, ne’ebé oferese oportunidade oioin kona-ba rekrutamentu, bolsa estudu iha rai-li’ur no formasaun profisionál.
“Ha’u hein katak feira ida-ne’e sai hanesan oportunidade ba joven sira atu hetan informasaun kona-ba empregu no edukasaun, hasoru-malu ho empreza sira no dezeña sira-nia futuru ho klaru. Liuliu, ba sira-ne’ebé partisipa iha feira ida-ne’e, uza didi’ak oportunidade ne’e atu dezenvolve sira-nia kapasidade no realiza mehi aas sira,” nia dehan.
Nia asegura katak Governu Repúblika Koreia sei kontinua prontidaun ba kooperasaun no fó apoiu ba joven Timor-Leste sira, hodi ajuda sira dezenvolve no hasa’e sira-nia kapasidade.
Feira karreira ajuda juventude
Alberto Lizzi, Senior Advisor iha Programa Nasaun Unida ba Dezenvolvimentu (UNDP-sigla ingleza), afirma katak juventude presiza asesu ba informasaun, rede profisionál, oportunidade estájiu no formasaun relevante atu aumenta empregabilidade no prepara sira-nia futuru.
Nia hatete katak, iha mundu tomak, iha tinan sanulu (10) oin mai, joven biliaun 1,2 sei ramata sira-nia estudu no tama iha merkadu traballu, maibé oportunidade empregu ne’ebé disponivel sei menus, ho estimativa katak iha de’it empregu millaun 400.
Nia esplika katak lakuna entre númeru joven ne’ebé tama iha merkadu traballu no oportunidade empregu ne’ebé disponivel la’ós problema Timor-Leste nian de’it, maibé mós sai dezafiu globál ne’ebé presiza atensaun no kolaborasaun hamutuk.
“Tanba ne’e, liuhusi Projetu Abilidade Empregu no Empreendedorizmu Juventude (YEES), UNDP servisu hamutuk ho parseiru sira atu hametin abilidade no koñesimentu juventude nian, promove empreendedorizmu no fasilita ligasaun entre joven sira ho empregadór iha setór privadu,” nia tenik.
Nia hateten katak formasaun mesak la sufisiente atu garante joven sira hetan empregu. Sira presiza mós informasaun ne’ebé klara kona-ba dalan karreira, nesesidade merkadu traballu, bolsa estudu, formasaun profisionál no oportunidade negósiu.
“Foin-sa’e sira mós presiza orientasaun kona-ba oinsá atu hasoru dalan karreira no ezijénsia merkadu traballu,” nia informa.
Nia afirma katak Feira Karreira no Empreendedorizmu Juventude halibur oportunidade oioin iha fatin ida de’it, hodi permite joven sira hasoru empregadór, universidade no parseiru sira atu buka informasaun no esplora oportunidade ba sira-nia futuru.
Atividade sira hanesan revizaun ba Curriculum Vitae (CV), entrevista simulada, akonsellamentu karreira no interasaun direta ho empregadór bele ajuda joven sira atu prepara an di’ak liután antes tama iha mundu servisu.
Reprezentante UNDP ne’e mós subliña katak susesu programa hanesan ne’e depende ba parseria entre Governu, instituisaun edukasaun no formasaun, setór privadu no parseiru dezenvolvimentu sira.
Nia konsidera katak kolaborasaun entre parte sira-ne’e importante atu kria ambiente ne’ebé suporta dezenvolvimentu koñesimentu no abilidade juventude nian, hametin koordenasaun no garante katak joven sira bele partisipa ativa iha prosesu determina sira-nia futuru.
“Futuru Timor-Leste nian, hanesan mós futuru mundiál, depende ba oinsá ita transforma poténsia hosi populasaun joven sai partisipasaun produtiva iha ekonomia,” nia afirma.
Ikusliu, nia hato’o agradese ba Universidade Nasionál Timor Lorosa’e (UNTL), ne’ebé sai uma-na’in ba eventu ne’e no kolabora ho UNDP hodi hala’o Feira Karreira no Empreendedorizmu Juventude.
Kontestu
Oportunidade empregu no dezenvolvimentu abilidade juventude sai hanesan prioridade importante iha Timor-Leste. UNDP, hamutuk ho Governu Timor-Leste no Ajénsia Kooperasaun Internasionál Koreia (KOICA), implementa Projetu Abilidade Empregu no Empreendedorizmu Juventude (YEES) atu hametin kapasidade joven sira, promove empreendedorizmu no aumenta asesu ba oportunidade empregu.
Iha inisiativa sira-ne’e, apoiu ba estájiu, formasaun abilidade profisionál, orientasaun karreira no ligasaun ho empregadór sai parte importante atu ajuda joven sira prepara an ba nesesidade merkadu traballu. UNDP mós apoia dezenvolvimentu plataforma dijitál SIMU-Web atu hadi’a asesu ba informasaun vaga empregu no fasilita ligasaun entre buka-empregu no empregadór.
Lee notísia relevante sira:
- UNDP, SEFOPE no KOICA organiza Feira Karreira no Edukasaun iha Ermera (2024)
- UNDP – Projetu Youth Employment and Entrepreneurship Skills (YEES)
- UNDP entrega plataforma SIMU-Web ba SEFOPE (2026)
Jornalista: Osória Marques
Editór: Xisto Freitas da Piedade
