Xanana informa ba Ramos-Horta kona-ba Dekretu-Lei Rejime Pagamentu Eletróniku
DILI, 29 Outubru 2026 (TATOLI)–Primeiru-Ministru, Kay Rala Xanana Gusmão, hasoru malu ho Prezidente Repúblika, José Ramos-Horta, iha Palásiu Prezidensiál Nicolau Lobato, hodi informa servisu Governu nian ne’ebé aprova ona iha Konsellu Ministru kona-ba dekretu-lei ida-ne’ebé estabelese rejime utilizasaun obrigatória atu halo pagamentu eletrónika.
Nia esplika, rejime foun ne’e sei aplika iha operasaun pagamentu no kobransa servisu sira.
“Iha operasaun pagamentu no kobransa de servisu, ita haree ida-ne’e mak di’ak tanba ita hakarak atu kurije, buat sira-ne’e mak informa ba Prezidente Repúblika,” Xanana Gusmão hateten ba jornalista sira hafoin enkontru ho Xefe Estadu, ohin.
Enkontru semanál ne’e nu’udar prátika regulár entre Xefe Governu no Xefe Estadu hodi koordena no informa malu kona-ba dezenvolvimentu servisu Estadu nian.
Konsellu Ministru hala’o sorumutu iha Palásiu Governu, 28 Outubru, aprova projetu Dekretu-Lei, ne’ebé aprezenta hosi Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay, no Governadór Banku Sentrál Timor-Leste (BCTL, sigla iha lian portugés), Hélder Lopes, kona-ba Rejime Jurídiku ba Utilizasaun Instrumentus Pagamentus Eletrónikus iha Ezersísiu Atividades Ekonómikas.
Diploma ne’e estabelese obrigasaun ba operadores atividade ekonómika atu disponibiliza no aseita instrumentu pagamentu eletróniku, ho objetivu atu promove efisiénsia, seguransa, transparénsia no rastreabilidade tranzasaun, nune’e mós dezenvolvimentu no utilizasaun sistema pagamentu nasionál.
Rejime ne’e abranje operadór atividade ekonómika nian iha territóriu nasionál tomak, fornesedór servisu pagamentu nian sira ne’ebé hetan autorizasaun husi BCTL, no mós Administrasaun Públika no entidade públika sira seluk
Fó ezesaun ba vendedór ambulante sira no ba atividade sira-ne’ebé hala’o iha área remota sira-ne’ebé laiha kondisaun téknika, teknolójika ka infraestrutura ne’ebé bele uza instrumentu sira-ne’e.
Operadór sira-ne’ebé inklui ona iha períodu fulan neen hodi adapta ho obrigasaun foun sira-ne’e, tanba diploma ne’e tama iha vigór iha loron dahuluk fulan tuirmai hafoin nia publikasaun.
Jornalista : Hortêncio Sanchez
Editór : Cancio Ximenes
