PAM Bobonaru reafirma kompromisu ba igualdade no inkluzaun ba feto hotu
BOBONARU, 03 Novembru 2026 (TATOLI) – Prezidente Autoridade Munisipál (PAM) Bobonaru, Paulo Moniz Maia, reafirma kompromisu atu hametin igualdade jéneru no inkluzaun ba feto hotu, inklui feto ho defisiénsia, feto iha área rurál no feto sira ne’ebé moris iha kondisaun vulneravel, atu hetan oportunidade hanesan iha programa dezenvolvimentu Governu.
Paulo Moniz Maia hato’o deklarasaun ne’e iha ninia diskursu bainhira partisipa iha komemorasaun Loron Nasionál Feto Timor-Leste ba-50, ho tema “Ami Feto Timor-Leste sei la rende, sei luta nafatin to’o atinje Igualdade no Inkluzaun”, ne’ebé raliza iha postu administrativu Bobonaru, munisípiu Bobonaru.
Nia esplika katak igualdade no inkluzaun la’ós de’it liafuan ne’ebé ko’alia iha serimónia, maibé kompromisu ne’ebé presiza hatudu liuhusi asaun konkreta iha moris loroloron.
“Ita presiza garante katak feto, inklui feto ho defisiénsia, feto iha área rurál no feto sira ne’ebé moris iha kondisaun vulneravel, hetan oportunidade atu partisipa, hato’o sira-nia hanoin no hetan benefísiu husi programa”, nia afirma.
Hidi hatutan katak autoridade munisipál tenke garante no hametin asesu feto ba formasaun profisionál, agrikultura moderna, atividade empreendedorizmu, kooperativa, merkadu no oportunidade empregu.
Iha tempu hanesan, presiza promove partisipasaun feto iha estrutura lideransa suku, konsellu konsultivu, organizasaun komunitária no prosesu foti desizaun iha nivel munisipál.
Prezidente ne’e subliña katak feto Timor-Leste nia kontribuisaun importante tebes iha istória luta ba ukun-rasik an no dezenvolvimentu nasaun, liuhusi sira-nia sakrifísiu, korajen no partisipasaun iha área polítika, edukasaun, sosiál, ekonomia, administrasaun públika no lideransa komunitária.
Tanba ne’e, nia konsidera feto la’ós de’it ema ne’ebé apoia família, maibé mós ajente transformasaun no parseira estratéjika iha konstrusaun nasaun, tanba feto iha kapasidade atu lidera, foti desizaun, jere rekursu no kontribui ba dezenvolvimentu sustentavel.
Maski nune’e, nia rekoñese katak feto balun kontinua hasoru obstákulu, hanesan asesu limitadu ba edukasaun no oportunidade ekonómika, violénsia bazeia ba jéneru, diskriminasaun, falta reprezentasaun iha fatin foti desizaun no limitasaun asesu ba rekursu produtivu.
Nia enfatiza katak edukasaun ba labarik feto mak investimentu ba família, komunidade no nasaun. Tanba ne’e, nia apela ba inan-aman no família sira atu fó apoiu ba labarik feto kontinua eskola, dezenvolve sira-nia talentu no prepara-an ba futuru.
“Ita labele husik feto ida sai vítima violénsia, diskriminasaun ka eskluzaun tanba de’it ninia jéneru, kondisaun ekonómika ka defisiénsia”, nia dehan.
Paulo Moniz mós konvida mane no joven sira atu sai parseiru iha luta ba igualdade, tanba igualdade la’ós kompetisaun entre feto no mane, maibé oportunidade justu, respeitu malu no responsabilidade hamutuk.
Nia husu komunidade atu hametin kultura respeitu, solidariedade no rejeisaun ba violénsia iha uma-kain no komunidade.
Autoridade ne’e apela ba feto Timor-Leste hotu atu kontinua hametin korajen, unidade no determinasaun, no la hakiduk ka rende iha luta ba igualdade no inkluzaun iha munisípiu Bobonaru no Timor-Leste.
Notísia relevante: Komemorasaun Loron Nasionál Feto ba da-50 reflete jornada feto Timor-Leste hosi luta pasada
Jornalista: Sergio da Cruz
Editora: Maria Auxiliadora
