GMPTL rekomenda SEI hametin programa apoiu ekonómiku ba feto iha área rurál
DIlI, 04 Novembru 2027 (TATOLI)-Grupu Feto Parlamentár Timor-Leste (GMPTL) sujere ba Sekretaria Estadu ba Igualidade (SEI) atu kontinua implementa programa empoderamentu ekonomia feto iha Timor-Leste, liuliu to’o área rurál.
Hakbiit ekonómia feto sira, liuliu feto iha área rurál ne’e liuhusi atividade negósiu hanesan loke kioske, haki’ak animál, ortikultura, impréstimu no seluk tan. Objetivu mak hamenus dependénsia ekonómia inan-feton sira ba sira-nia parseiru ka la’en hodi kontribui ba prevensaun violénsia doméstika no violénsia bazeia ba jéneru iha rai-laran.
Iha ámbitu komemorasaun Loron Nasionál Feto ba da-50 iha 03 Novembru, deputada membru GMPTL, Cedelízia Faria dos Santos, apresia tanba nasaun iha progresu ba pomosaun feto hodi okupa iha kargu lideransa hanesan sai deputadu, membru Governu no seluk tan ho númeru boot.
Maibé, tuir fiskalizasaun iha baze, liuliu área rurál, feto sira ne’ebé laiha ekonomia rasik sempre hasoru violénsia bazeia ba jéneru iha sira-nia moris. Nune’e nesesita duni nian kontinua programa empoderamentu ba feto to’o área rurál hodi hakbi’it sira.
“Nu’udar reprezentante povu hanesan feto kontinua tau matan ba problema [ne’e]. Ami ne’ebé hola parte iha GMPTL hanoin tun bá halo fiskalizasaun tenke rona mós ami-nia maluk feto sira-nia problema ne’ebé hasoru”, nia dehan iha Parlamentu Nasionál, ohin.
Nia mós felisita feto Timor-Leste tomak iha komemorasaun loron importante ne’e hodi kontinua enkoraja atu partisipa di’ak liután iha prosesu dezenvolvimentu.
Deputada ne’e kontinua tau matan ba asuntu feto liga ho lejizlasaun sira ne’ebé durante ne’e iha no bainhira lakuna ruma bele halo alterasaun hodi proteje liután feto sira.
Nia dehan iha diskusaun ba proposta Orsamentu Jerál Estadu (OJE) 2027 sei tau atensaun mós ba preokupasaun ne’ebé iha, liuliu alokasaun orsamentál. Deputada ne’e, apresia ho serbisu husi organizasaun sosiedade sivíl sira ne’ebé durante ne’e hala’o advokasia iha asuntu feto atu kontinua hamutuk hodi promove asuntu igualdade jéneru no kombate forma violénsia oioin hasoru feto.
Governu Timor-Leste selebra tinan 50 Loron Nasionál Feto, iha munisípiu Bobonaru, hodi valoriza luta, sakrifísiu no kontribuisaun feto timoroan durante tempu rezisténsia to’o konstrusaun Estadu no dezenvolvimentu nasionál.
Selebrasaun tinan 50 Loron Nasionál Feto Timor-Leste ne’e ho tema “Feto Timor-Leste: Selebra Tinan 50 Igualdade no Inkluzaun”, ho lema “Ami Feto Timor-Leste Sei La Rende, Sei Luta Nafatin To’o Atinje Igualdade no Inkluzaun”.
Notísia relevante: Tinan 50 Loron Nasionál Feto, Governu fó omenajen ba luta no sakrifísiu eroína timoroan
Jornalista: Nelson de Sousa
Editora: Maria Auxiliadora
