“Governu halo la loos presiza buka solusaun, la’ós halo manifestasaun arbiru tun-sa’e”
DILI, 04 Novembru 2026 (TATOLI)–Primeiru-Ministru, Kay Rala Xanana Gusmão, hateten Prezidente Repúblika, José Ramos-Horta, husu nia atu apela ba foin-sa’e sira atu labele kopia manifestasaun sira-ne’ebé akontese iha rai seluk hodi halo arbiru iha Timor-Leste.
“Nune’e duni Prezidente Repúblika husu mai ha’u atu apela ba joven sira labele kopia manifestasaun sira-ne’e hodi halo arbiru. Buat ruma Governu halo la loos presiza ko’alia hodi buka solusaun, la’ós halo manifestasaun arbiru tun-sa’e hanesan rai barak akontese,” Xefe Governu hateten ba Jornalisra sira hafoin ramata enkontru semanál ho Xefe Estadu José Ramos-Horta iha Palásiu Prezidensiál Nicolau Lobato, Bairru Pite, ohin.
Xefe Governu ne’e hatutan, Prezidente Repúblika iha tersa ne’e aranka ba Korea Súl no sei kontinua viajen ba Bruselas no Fransa hodi partisipa iha enkontru kona-ba pás mundiál.
“Ne’eduni, prezidente ohin sai ba Korea Súl depois nia sei liu ba Bruselas, Fransa hodi ko’alia kona-ba pás, oinsá bele iha pás hodi lori moris di’ak ba ema hotu,” nia hateten.
Iha biban hanesan, Xanana mós hato’o kona-ba situasaun ekonomia iha Europa ne’ebé oioin afeta husi funu iha Ukrania.
“Nasaun hotu iha Europa sira-nia osan sinu husi Banku Europeia, maibé osan menus ona tanba nasaun sira Europa tau osan hamutuk ajuda funu iha Ukrania, ikus populasaun barak mak terus ba kustu vida karun no sslariu tun,” nia dehan.
Jornalista : Hortêncio Sanchez
Editór : Cancio Ximenes
