Komisaun C la konkorda ho pedidu orsamentu adisionál ba OJE 2027
DIlI, 04 Novembru 2027 (TATOLI) – Prezidente Komisaun C ne’ebé trata Asuntu Finansa Públika, Cedelízia Faria dos Santos, la konkorda ho pedidu orsamentu adisionál ne’ebé ministériu no entidade públika balun aprezenta durante audiénsia públika ba proposta Orsamentu Jerál Estadu (OJE) 2027.
Parlamentu la konkorda tanba tetu proposta OJE 2027 ho montante boot, tanba ne’e labele aumenta tan. Maibé hakarak husu pedidu adisionál bele halo de’it mudansa entre kategória orsamentál bainhira nesesita duni.
“Ami simu ona pedidu husi ministériu lubun atu halo mudansa ba sira-nia orsamentu iha parte balun, maibé sei la fó impaktu ba tetu totál, tanba halo de’it mudansa alokasaun verba”, nia hatete iha Parlamentu Nasionál, ohin.
Cedelízia la fó esplikasaun detalla kona-ba pedidu orsamentu adisionál ne’ebé ministériu no instituisaun públika sira aprezenta.
Iha 01 Outubru 2026 Ministériu Finansa (MF), submete Proposta Lei OJE 2027 ho montante billaun $2.568,5 ba Parlamentu Nasionál.
Tuir nia, alokasaun orsamentu ne’e fó prioridade ba kategória boot liu mak ba setór ekonomia hanesan agrikultura, edukasaun, saúde no seluk tan.
Tuir kalendáriu ne’ebé estabelese ona, diskusaun ba proposta OJE 2027 sei hahú ho debate iha faze jeneralidade, husi loron 09 to’o 11 Novembru 2026. Depois, diskusaun sei kontinua iha faze espesialidade durante loron sanulu. Iha loron 04 Dezembru 2026, Parlamentu Nasionál sei halo votasaun finál globál ba proposta OJE 2027. Hafoin aprovasaun, sei prepara redasaun finál atu haruka ba Prezidente Repúblika hodi promulga.
Notísia relevante: PN deside debate proposta lei OJE 2027 iha jeneralidade hahú 09 Novembru
Jornalista: Nelson de Sousa
Editora: Maria Auxiliadora
