CAC rejista kazu 91 to’o Outubru tinan ne’e
DILI, 05 Novembru 2026 (TATOLI)–Adjuntu Komisáriu ba Komisaun Antí-Korrupasaun (CAC, sigla portugés), Alvaro Maria Freitas, hateten, CAC konsege rejista kazu 91 to’o Outubru tinan ne’e.
“Primeiru ita komesa husi keixa ne’ebé mak CAC rejista durante tinan ida-ne’e to’o Fulan-Outubru ita simu keixa 91, husi kazu ne’e prosesu ona 32, prosesu ita tama iha etapa averiguasaun,” Alvaro Maria informa ba Jornalista sira iha nia knaar fatin, Farol, Kinta ne’e.
Nia dehan, etapa averiguasaun ne’e ezemplu bainhira innvestigadór sira suspeita katak iha Funsionáriu Públiku ka emprezáriu balun ne’ebé halo kontratu ho Estadu iha indikasaun krime.
“Titulár Prosesu haruka karta ba ministériu relevante ka kona-ba kompañia sira ka ba ema sira ne’ebé iha relasaun ba kazu ne’e para husu dokumentu, ba esplikasaun ruma no seluk tan. Husi prosesu ida-ne’e mak ita tama ba prosesu hotu, ita haruka ba Ministériu Públiku halo auto partipasaun,” nia akresenta.
Notísia relevante : CAC alerta ba funsionáriu públiku atu labele utiliza veíkulu Estadu ba fins partikulár
Husi kazu 91 ne’e, iha kazu hamutuk 28 mak halo ona auto-partisipasaun ba Ministériu Públiku, nune’e restu 31 iha prosesu distribuisaun ba investigadór sira.
Adjuntu Komisáriu hatutan, CAC sempre tau-atensaun ba preokupasaun públiku ba obra Estadu sira ne’ebé abandonadu.
“Ha’u labele temi ida pur ida, ida-ne’e hanesan segredu Justisa, maibé prontu ha’u atu dehan katak kazu sira ne’ebé mak imi tau iha rede sosiál ne’e ami sempre tau-atensaun, tanba ida-ne’e mak ha’u temi jerál de’it, katak kazu sira ne’e ema keixa mai, komunidade keixa ita sempre fó atensaun másimu,” nia hato’o.
Iha biban ne’e, Alvaro Maria hateten, ba kazu falta ai-moruk iha Institutu Nasionál Farmásia no Produtu Médiku inklui konstrusaun Igreja Ai-mutin ne’e tama ona iha faze averiguasaun.
“Atu dehan jerál katak kazu ne’e tama hotu ona iha etapa, inklui mós Igreja Ai-Mutin. Ne’ebé parese iha fulan-ida semana ida ka rua hanesan ne’e informasaun kona-ba ohin Igreja Ai- Mutin, maibé ha’u labele ko’alia iha ne’e,” nia subliña.
Jornalista : Natalino Costa
Editora : Julia Chatarina
