Parlamentu hein Governu submete proposta alterasaun lei eleitorál haat
DIlI, 05 Novembru 2026 (TATOLI) – Parlamentu Nasionál hein Governu atu submete proposta alterasaun pakote Lei Eleitorál Munisipál, Resensiamentu Eleitorál, Eleitorál ba Parlamentu Nasionál no Eleitorál ba Prezidente Repúblika.
Prezidente Komisaun A ne’ebé trata Asuntu Konstitusionál no Justisa, Natalino dos Santos, hatete pakote lei hirak ne’e Konsellu Ministru aprova ona no agora hein submisaun ba meza Parlamentu.
Komisaun konsidera alterasaun ne’e importante, nune’e sei fó prioridade diskusaun depoizde ramata debate proposta Lei Orsamentu Jerál Estadu (OJE) 2027 iha fulan-Dezembru ne’e.
“Komunika ona ho Ministru Administrasaun Estatál (MAE) atu haruka mai meza Parlamentu. Komisaun prepara ona kalendáriu audiénsia públika bainhira simu, fó kedas segmentu”, nia salienta.
Deputadu dehan Komisaun hakarak halo diskusaun no aprovasaun antes Prezidente Repúblika dekreta data Eleisaun Prezidensiál ne’ebé sei realiza iha tinan 2027 hodi halo ajustamentu atu parte Ezekutivu prepara di’ak liután organiza eleisaun sira ne’ebé atu mai.
Prezidente Komisaun ne’e seidauk esplika detalla konteúdu alterasaun lei hirak ne’e.
Lembra katak, iha 21 Outubru 2026, Konsellu Ministru aprova projetu Proposta-Lei haat, ne’ebé aprezenta husi Ministru Administrasaun Estatál, Tomás do Rosário Cabral, relasiona ho alterasaun lejizlasaun eleitorál no rejistu eleitorál, ho objetivu atu atualiza no armoniza prosedimentu eleitorál, moderniza sistema resenseamentu nomós fasilita ezersísiu direitu votu nian.
Proposta sira-ne’ebé aprova ona inklui alterasaun daruak ba Lei n.º 22/2021, loron 4 fulan-Novembru, Lei Eleitorál Munisipál; alterasaun daruak ba Lei n.º 6/2016, loron 25 fulan-Maiu, Lei Resenseamentu Eleitorál; alterasaun daneen ba Lei n.º 6/2006, loron 28 fulan-Dezembru, Lei Eleitorál ba Parlamentu Nasionál; no alterasaun ba dahituk ba Lei n.º 7/2006, loron 28 fulan-Dezembru, Lei Eleitorál ba Prezidente Repúblika.
Notísia relevante: Governu aprova atu estabelese sentru resensiamentu eleitorál iha rai-li’ur
Jornalista: Nelson de Sousa
Editora: Maria Auxiliadora
