JuS konsidera Yudi Pamunkas seidauk elijível okupa kargu Juíz Administradór Tribunál Dili

DILI, 06 Novembru 2026 (TATOLI)—Advogada husi Justisa Sosiál (JuS), Maria Agnes Bere, konsidera katak Juíz Yudi Pamunkas seidauk elejível okupa kargu Juíz Administradór Tribunál Dili.

Agnes Bere no Olívio Barros nu’udar mandatáriu husi Juíz na’in-haat ne’ebé daudaun ne’e hetan transferésia husi desizaun Konsellu Superiór Majistratura Judisiál bá serbisu fali iha Tribunál seluk.

“Tuir lei katak hanesan ohin ami informa katak Juíz Administradór ba Tribunál Primeira Instánsia ne’e husi terseira klase, tuir lei loloos entre Juíz sira segundu klase. Nomós ninia antiguidade iha prosesu sira ka ninian knaar nu’udar juíz,” Maria Agnes Bere hateten ba jornalista sira iha nia knaar fatin, JuS, Motael, Sesta ne’e.

Tuir nia, atuál Juiz Administradór Tribunál Dili Yudi Pamunkas seidauk priese ba antiguidade atu okupa kargu hanesan Juíz Administradór.

“Iha Juíz Administradór ne’ebé mak agora (Juíz Yudi Pamunkas) nia kumpre ka nia hala’o hela ne’e nia foin mak tinan ne’e, nia esperiénsia prátika ne’ebé mak iha barak liu tinan-10 ba leten ne’ebé mak hala’o knaar nu’udar Juíz Administradór Tribunál Judisiál Primeira Instánsia nian,” nia akresenta.

Notísia relevante : Yudi Pamunkas: “Ha’u kumpre de’it kompeténsia ne’ebé lei fó”

Iha sorin seluk, Juíz Administradór Tribunál Judisiál Primeira Instánsia Dili, Juiz Yudi Pamunkas lakohi fó komentáriu kona-ba ketaun ne’e.

“Ne’e ha’u laiha komentáriu ba ida-ne’e, bele ba husu Prezidente Tribunál Rekursu kona-ba ida-ne’e,”  nia tenik.

Entratantu, tuir Lei Organizasaun Judisiál lei númeru 25/2021, 02 Dezembru, iha sesaun II Artigu 62.° ne’ebé ko’alia kona-ba Juíz Administradór, iha Tribunál Judisiál Primeira Instánsia, ida-idak iha juíz administradór ida.

Artigu 63 hateten; Nomeasaun

Juíz Administradór nomeia, husi eskolla, husi Konsellu Superiór Majistratura Judisiál, iha komisaun serbisu ba períodu tinan-tolu, husi juís sira ne’ebé ezerse.

Juíz Administradór iha kompeténsia jestaun prosesuál tuir mai :

1. Propoin ba Konsellu Superiór Majistratura Judisiál métodu servisu no objetivu mensurável sira ba tribunál bainhira presiza.
2. Akompaña movimentu prosesuál tribunál nian, identifika, liu-liu, prosesu sira ne’ebé pendente ba tempu ne’ebé konsidera exesivu ka ne’ebé la rezolve iha prazu ne’ebé konsidera razoável, informa Konsellu Superiór Majistratura Judisiál no propoin medida sira ne’ebé justifika;
3. Sujere aplikasaun medida simplifikasaun no ajilizasaun prosesuál sira;
4. Propoin ba Konsellu Superiór Majistratura Judisiál reafetasaun juís sira nian, ho sira nia konkordánsia, iha ámbitu tribunál judisiál primeiru instánsia nian, ho objetivu distribuisaun rasionál no efisiente servisu nian;
5. Halo reafetasaun ofisiál justisa no funsionáriu sira iha tribunál refere nia laran no iha limite legalmente definidu sira.

Juiz administradór iha kompeténsia administrativa tuir mai:

• Aprezenta proposta sira ba orsamentu tribunál nian;
• Elabora planu anuál no plurianuál atividade sira no relatóriu atividade sira;
• Elabora regulamentu internu sira tribunál judisiál primeiru instánsia nian no juízu sira nian;
• Propoin alterasaun orsamentál sira ne’ebé konsidera adekuadu;
• Partisipa iha konsepsaun no ezekusaun medida organizasaun no modernizasaun tribunál sira nian;
• Planeia nesesidade rekursu umanu sira.
• Juíz administradór ezerse kompetensia tuir saida mak kosellu delega.

Jornalista     : Natalino Costa

Editora          : Julia Chatarina