Vise PM Assanami husu entidade tomak valoriza selebrasaun Masakre Santa Krúz
DILI, 09 Novembru 2026 (TATOLI)–Vise Primeiru-Ministru (PM) ba Asuntu Sosiál no Ministru Dezenvolvimentu Abitasaun Komunitária, Mariano Assanami Sabino husu ba entidade tomak atu valoriza no dignifika selebrasaun ba dala-35 Masakre Santa Krúz iha 12 Novembru.
“Husu ba komunidade, husu ba joventude sira, husu ba inan-aman sira iha Timor laran, husu ba universitáriu sira, husu ba SMA sira mai ho imi-nia farda ita selebra 12 Novembru,” Mariano Assanami hateten ba jornalista sira bainhira partispa iha diskusaun Orsamentu Jerál Estadu (OJE) 2027 iha faze jeneralidade, iha Parlamentu Nasionál, Segunda ne’e.
Nia konsidera, 12 Novembru la’ós de’it ba vítima Masakre nia família de’it maibé nu’udar loron istóriku ba Povu Maubere.
“La’ós ami lidera organizasaun rezisténsia sira mak tenke ba selebra ida-ne’e. Horibainrua kuandu ita muda Sebastião ninian restu mortais mai fali oin, ita bá misa, iha ne’ebá ema oituan tebes mak partisipa, ne’e hatudu katak ita laiha sensibilidade ba ita-nia istória, ba ita-nia nasaun nia ema lubuk ne’ebé kontribui ba rai ida-ne’e. Lubuk ida ita seidauk hetan sira-nia restu mortais ne’e iha ne’ebé, ita tenke rekoñese,” nia akresenta.
Notísia relevante : Komité 12 Novembru husu ME atu integra istória Masakre Santa Krúz iha kurríkulu nasionál
Assanami dehan, Timor seidauk hetan restu mortál sira ne’ebé lakon tanba ne’e nia husu povu tomak atu iha sensibilidade.
“Loron ne’e ita husu para hotu-hotu organiza, idaidak mai ho ninia identidade laiha problema, sira ne’ebé partidu polítiku bele mai ho identidade ou ita mai hamutuk iha loron sira hanesan ne’e tanba ita-nia diferénsa ne’e halo di’ak ba ita-nia rain, mas ita-nia istória ne’e pasadu ona, hotu-hotu tenke fó valór,” nia subliña.
Governante ne’e dehan, labele husik ema ne’ebé iha ligasaun emosionál ho Masakre Santa Krúz mak selebra loron istóriku ne’e maibé entidade hotu presiza hola parte.
“Dala ida tan, selebra iha fatin-fatin la’ós iha ne’e de’it, eskola sira bele selebra iha idaidak nia eskola, iha rurál sira bele selebra iha munisípiu maibé sira ne’ebé iha postu ne’e mai ita konsentra iha Motael, misa tiha iha ne’ebá hanesan baibain depois ita la’o ain oituan bá Santa Krúz,” nia fó-hanoin.
Assanami hatutan: “12 Novembru ne’e tuir loloos la’ós loron feriadu maibé hanesan loron ne’ebé ita fó fatin atu selebra Maskre Santa Krúz, eskola sira la’ós atu feriadu, funsionáriu sira la’ós atu feriadu, mai hamutuk para ita selebra 12 Novembru.”
Jornalista : Natalino Costa
Editora : Julia Chatarina
