CAC halo apreensaun ba karreta Estadu inklui asegura motorista tanba tula dirijente nia oan
DILI, 10 Outubru 2026 (TATOLI)—Ekipa Komisaun Antí-Korrupasaun (CAC, sigla portugés) liuhusi operasaun ida iha Tersa ne’e, hahú tuku 06:00 to’o 08:30, halo apreensaun ba karreta Estadu tolu inklui asegura nia motorista tanba tula kargu xefia nia oan bá eskola.
Diretór Jerál Investigasaun CAC, José Verdial, informa, ekipa halo apreensaun ba karreta rua iha Eskola Portuguesa no karreta Estadu ida iha Eskola Internasionál ida iha Balide ho ema na’in-rua nu’udar motorista kargu xefia Komisaun Funsaun Públika no motorista seluk husi Tribunál Rekursu ne’ebé lori Autór Judisiál balun nia karreta.
CAC asegura motorista na’in-tolu ho fraglante delitu tanba identifika uza karreta Estadu la’ós ba fins Estadu maibé ba interrese privadu.
“Atu informa de’it ba públiku katak loos duni ohin loron ekipa CAC Diresaun Investigasaun halo asaun rutina ne’ebé kabe ba kompeténsia. Entaun, ohin dadeersan ekipa halo atividade fiskalizaun ba uzu veíkulu Estadu, entaun iha atividade ida-ne’e ekipa sira haree rasik ho matan iha kargu xefia balun ne’ebé mak utiliza karreta Estadu ba fins privadu. Tanba ne’e halo kedan atuasaun,” José Verdial relata ba jornalista sira iha nia knaar fatin, Farol.
Notísia relevante : PNTL sei halo apreensaun ba karreta Estadu ne’ebé halo movimentu iha loron boot
Nia dehan, aktu sira ne’ebé mak ekipa haree ho matan ne’e konsidera hanesan fraglante delitu, nune’e bazeia ba artigu 118 husi Kódigu Prosesu Penál, maka tenke lori objetu apreendidu inklui ema ne’ebé lori patrimóniu Estadu hodi halo prosesu.
“Hanesan órgaun Polísia Kriminál Espesializada ne’ebé mak iha kompeténsia haree ba asuntu ida-ne’e, liuliu haree ba krime pekulatu de uzu, entaun ekipa halo kedan atuasaun ita prende kedan karreta sira ne’ebé utiliza no ita lori mai halo identifikasaun,” nia informa.
Ekipa lori objetu aprendidu inklui ema na’in-tolu bá edifísiu CAC hodi submete ba prosesu, nune’e bainhira submete ba prosesu iha indísiu krime pekulatu de uzu, maka ekipa sei submete ba Ministériu Públiku hodi detein.
“Husi prosesu identifikasaun mak ita haree prova sira ne’ebé mak sufisiente, entaun ita sei halo prosesu kontinuasaun, sei detein no lori bá aprezenta iha Tribunál liuhusi Ministeriu Públiku hanesan lei hateten dentru de 72 oras depois ba prosesu ne’ebé mak iha sumáriu,” nia esplika.
Diretór subliña, Estadu fó transparente ba kargu xefia sira atu utiliza patrimóniu Estadu ba interrese Estadu.
“Patrimóniu Estadu ne’e inklui karreta, kombustível no motarista tanba Estadu selu para depois atu bele fó apoiu ba kargu xefia sira para depois halo serbisu profisionál la’ós halo filafali serbisu ne’ebé kaben ba fins privadu nian,” nia reforsa.
José Verdial defende, CAC iha ekipa forte ne’ebé sei kontinua monitoriza no fiskaliza sirkulasaun karreta Estadu ne’ebé lahó gia de marsa, maka sei halo atuasaun hodi kontinua submete ba identifikasaun.
“Ami-nia asaun la’ós to’o ohin de’it maibé ba oin sei kontinua hanesan ne’e, ba hirak ne’ebé lori karreta Estadu lahó fins Estadu nian ka ba interrese Estadu ami sei atua,” nia afirma.
Jornalista : Natalino Costa
Editora : Julia Chatarina
