TR deside KSMJ suspende desizaun muda Juíz na’in-haat bá fatin seluk
DILI, 11 Novembru 2026 (TATOLI)–Tribunál Rekursu (TR), Kuarta ne’e, deside afavór ba rekursu efikásia ne’ebé mak aprezenta husi Juíz na’in-haat nia Advogadu hodi kontra desizaun Konsellu Superiór Majistratura Judisiál (KSMJ) ba transferénsia Juíz na’in-haat ne’ebé hala’o knaar iha Tribunál Judisiál Primeira Instánsia Dili.
Juiz na’in-haat ne’ebé KSMJ deside transfere ba Tribunál Judisiál iha munisípiu seluk lahó razaun kusta kauza mak hanesan Juíza Ana Paula Fonseca, Juíza Francisca Cabral, Juíz António Fonseca no Juíz José Gonçalves.
Nune’e, iha loron-lima hahú husi loron 29 Outubru 2026, TR notifika Prezidente Konsellu Superiór Majistratura Judisiál, Afonso Carmona hodi fó nia resposta ba Konsellu nia desizaun.
Notísia relevante : Jurista : “KSMJ iha kompeténsia halo transferénsia ba juíz maibé presiza haree antiguidade”
Akordaun TR ohin liuhusi Juíz Koletivu, Duarte Tilman (relatór) Deolindo dos Santos no Edite Palmira dos Reis deside afavór ba rekursu efikásia ne’ebé parte Defeza husi Juíz sira hato’o no iha desizaun TR husu atu KSMJ suspende tiha nia desizaun ne’ebé antes ne’e delibera no deside ona hodi muda Juíz na’in-haat.
Ho nune’e, Juíz TR deside atu julga prosedente insidente kautelár suspensaun efikásia ida ne’e, konsekuentemente:
a) Dekreta suspensaun efikásia deliberasaun KSMJ nian, husi 21 Agostu 2026, iha parte ne’ebé determina transferénsia Juíz António Fonseca, Ana Paula, José Gonçalves no Francis Cabral bá Tribunál Judisiál Primeira Instánsia Baukau, Suai no Oekusi Ambeno;
b) Determina katak, enkuantu suspensaun ida ne’e vigora, majistradu sira ne’ebé refere hela ermanese provizoriamente iha Tribunál sira ne’ebé sira koloka ba antes ezekusaun deliberasaun ne’ebé impugna, hodi mantein ezersísiu sira-nia funsaun jurisdisionál sira.
Laiha kustu, tanba sira legalmente izentu husi ne’e (art. 31°, al. c) no 201º, n.º 3 EMJ nian).
Hatán ba kestaun ne’e Prezidente Konsellu Superiór Majistratura Judisiária, Afonso Carmona, hateten, nia seidauk simu notifikasaun husi TR relasiona desizaun KSMJ.
“Maski desizaun sai ona, maibé ha’u seidauk simu notifikasauun ida, ne’ebé ha’u seidauk bele ko’alia buat ida,” Carmona hato’o ba jornalista sira hafoin fó pose ba Juíz Administradór Tribunál Judisiál Primeira Instánsia haat no Juíz karreira terseira klase na’in-12 iha Tribunál Dili, Kaikoli.
Nia dehan, nu’udar Prezidente KSMJ, hanesan ema ne’ebé envolve desizaun ne’e labele ko’alia tanba ne’e regra peosesuál mak nune’e.
Jornalista : Natalino Costa
Editora : Julia Chatarina
