Tribunál absolve Antigu Vise-Ministru JdS husi krime burla agravada
DILI, 11 Novembru 2026 (TATOLI)—Tribunál absolve Antigu Vise-Ministru Negósiu Estranjeiru no Kooperasaun, JdS husi krime burla agravada ne’ebé Ministériu Públiku imputa tanba faktus la provadu.
“Faktus ne’ebé la provadu katak arguidu hasoru malu diretamente ho lezadu, no faktus ne’ebé la aprovadu iha desizaun ne’e mak arguidu husu osan $.5000 ba lezadu. Ho faktus sira ne’ebé la provadu maka Tribunál deside absolve direta arguidu husi krime burla agravada,” Advogadu Privadu Ismael Asunção ne’ebé hanesan Defeza husi JDS, hato’o ba Jornalista sira iha Tribunál Judisiál Primeira Instánsia Dili, Kuarta ne’e.
Nia esplika, Tribunál konsidera faktu sira provadu mak hanesan altura ne’ebá JDS hasoru malu ho AdSC no RLG.
Tribunál mós la konsidera rekerimentu husi Ministériu Publiku, ba alterasaun kualifikasaun jurídika husi krime burla agravada iha krime korrupsaun pasiva. Tanba altura ne’ebé seidauk iha vaga ne’ebé taka iha edifísiu Ministériu Negósiu Estranjeiru no Kooperasaun.
Notísia relevante : MP husu Tribunál aplika pena prizaun tinan-lima ba Antigu Vise-Ministru JdS
“Tribunál deklara absolve husi krime burla agravada tanba la’ós arguidu maka imediatamente husu osan ba lezadu, maibé atraves husi AdCS no RLG, ida-ne’e maka la konsidera hanesan krime, absolve arguidu husi akuzasaun,” nia katak.
Advogadu dehan, kazu indenizasaun sivíl ne’e Ministériu Públiku la rekere kona-ba devolve osan, maibé Tribunál husu lezadu hatama prosesu sivíl kontra arguidu, lezadu no testamuña osan $5.000.
Akuzasaun
Iha faktus katak, iha tinan 2020, ofendidu BL koñese arguidu liuhusi nia alin RLG ne’ebé koñese di’ak AsdC ne’ebé hanesan Asesór nomós partidu ida (KHUNTO) hamutuk ho arguidu hodi fó hatene ba nia atu sai Embaixadór.
Iha loron 27 Jullu 2020, testemuña RLG fó hatene ba ofendidu atu prepara nia Kurríkulu Vitae (CV) hamutuk ho osan $5.000 atu lori ba entrega iha arguidu nia serbisu fatin, Ministériu Negósiu Estranjeiru no Kooperasaun iha Pantai Kelapa.
Iha loron 30 Jullu 2020, ofendidu ba halo levantamentu osan ho montante $5.000 iha Banku Nasionál Komérsiu Timor-Leste (BNCTL) atu lori bá entrega iha arguidu tuir promesa.
Iha loron 30 Jullu 2020, pur volta 14:00, Antigu Vise-Ministru JDS nia fatin iha Dili, ofendidu BL hamutuk ho testemuña RLG no AdSC entrega osan $5.000.00 ba arguidu.
Ofendidu entrega osan ba arguidu tamba arguidu hato’o promesa ba nia atu asume knaar nu’udar Embaixadór maibé defaktu la akontese.
Konsekuénsia husi arguidu nia hahalok ne’e, halo ofendidu lakon nia osan ho montante $5.000. Arguidu hatene katak banhira ba bosok ema hodi hetan ema-nia osan ne’e halo ema lakon osan maibé arguidu halo nafatin.
Arguidu halo krime ho livre, deliberada, konsentemente no hatene katak hahalok ne’e proibidu no hetan pena tuir lei. Tamba ne’e konsidera arguidu hanesan autór materiál ba krime burla agravada.
Prosesu ne’e prezide husi Juíz Kolektivu, Juíz prosesu Arjentino Nunes, ho nia Adjuntu Juíz Ivan Patrocino, Juíz estajiáriu na’in-ida, Ministériu Públiku reprezenta husi Prokuradór Nelson Magno, no arguidu hetan asisténsia legál husi Advogadu Privadu Ismael Asunção Lopes.
Jornalista : Natalino Costa
Editora : Julia Chatarina
