Xanana husu timoroan presta omenajen ba eroi “Masakre Santa Kruz”
DILI, 11 Novembru 2026 (TATOLI)—Primeiru-Ministru, Kay Rala Xanana Gusmão, husu ba entidade hotu-hotu atu presta omenajen ba erói sira iha ámbitu selebrasaun loron nasionál juventude 12 Novembru ne’ebé identíku ho “Masakre Santa Kruz” ba da-34.
Notísia Relevante: Xanana hakerek karta ba Gregorio “Mouris” halo manifestasaun iha 12 Novembru 1991
Xefe Governu hato’o mensajen ba selebrasaun loron nasionál juventude “Masakre Santa Kruz” atu ema hotu fó presta omenajen ba erói sira-ne’ebé mate no kontribui lori TL nia asuntu funu nian ba mundu liuhusi loron 12 Novembru.
“Ohin loron, ita loke televizaun haree milatár Indonézia sira oho ema iha fatin-fatin, kuitadu. Ita tinan 24 mundu haluha tiha ita, mundu lahatene no lakohi rona katak ita terus hela,” Xefe Governu relata molok termina diskusaun OJE 2027 iha Parlamentu Nasionál, ohin.
Iha loron 12 Novembru, nia sdehan, nu’udar loron istóriku importante tebes ba Timor-Leste, tanba ne’e aban TL mós sei presta omenajen ba Jornalista seniór, saudozu Max Stahl ne’ebé ho brani bele hasai imajen hodi hatudu ba mundu katak loos duni Timor-Leste infrenta problema boot.
Masakre Santa Cruz mak akontesimentu istóriku ida ne’ebé importante tebes iha luta povu Timor-Leste nian ba independénsia. Trajedia ne’e akontese iha loron 12 fulan-Novembru tinan 1991, iha simetériu Santa Cruz, Díli, durante períodu okupasaun Indonézia iha Timor-Leste.
Enkuantu, tuir relatóriu istóriku husi Komisaun Simu, Lia-Loos no Rekonsiliasaun (CAVR), iha relatóriu Chega!, rejista iha ema na’in-271 mak mate, ema na’in-250 mak lakon no ema atus ba atus mak hetan kanek.
Notísia Relevante: Sé Mak Responsabiliza? Xanana Gusmão!
Jornalista : Alexandra da Costa
Editór : Cancio Ximenes
