Misa 12 Novembru, Padre Angelo: “Imi mak lori ukun ita-nia beiala sira-nian”
DILI, 12 Novembru 2026 (TATOLI)—Timor-Leste selebra loron nasionál Juventude ba dala-19 no Masakre Santa Krúz ba dala-35 ho Misa ne’ebé prezide husi Padre Pároku Balide, Angelo Salsinha.
“Imi mak loro ukun ita-nia beiala sira-nian, ho imi mak Timor ohin sai ba naroman, sai nasaun ida-ne’ebé soberanu, nasaun ida-ne’ebé marka nia-an iha mundu rai klaran ho identidade isória própriu tanba imi mak deside dezafiu sira dadolin husi beiala sira-nian, imi mak fó resposta,” Padre Angelo Salsinha hato’o iha nia omília bainhira prezide Misa iha Igreja Motael, Kinta ne’e.
Notísia relevante : Kalan reflesaun: Hanoin hikas sakrifísiu Juventude Loriku Aswa’in 12 Novembru 1991
Nia konsidera, selebrasaun Masakre Santa Krúz hanoin hikas ba moris iha espíritu ida-de’it.
“Timor kiik eh boot beik ka matenek, ita hotu dehan ba sira, tanba imi mak ami sai hanesan ne’e, tanba imi mak ami hetan bensaun grasa ne’e nakonu,” nia akresenta.
Amu dehan, espíritu 12 Novembru mak sai forsa ba povu hodi kontinua haforsa funu to’o hetan ukun-an. Tanba ne’e, joven sira presiza aprende nafatin ispíritu ne’e iha loron ohin.
“Se bensaun no grasa ita tenke dame, ita tenke respeita, ita tenke identifika valores obrigasaun vertude,” nia katak.
Padre Angelo iha biban ne’e, husu hotu-hotu halo medita vokasaun nu’udar bensaun ida ba rai-ne’e no ba beioan sira.
“Espíritu ne’ebé Nai hatudu nia oin mamar ba o, tanba oin mamar ida-ne’e mak fó sira-nia an tomak ba naroman atu ita bele oin to’os ba malu, atu ita labele moris iha espíritu atan, atu ita labele tauk maibé ita moris iha espíritu ne’ebé Maromak oan, ema ida damen nia oan, tanba kontempla ba Maromak nia oin mamar loos, kontempla Maromak nia domin mak dalan mizerikordia,” nia tenik.
Hafoin Misa, entidade oinoin hahú marxa husi Igreja Motael to’o Rate Santa Krúz hodi kari ai-funan iha Krúz Boot no fó omenajen ba joven rezisténsia sira-ne’ebé lakon vida durante Masakre Santa Krúz.
Loron nasionál juventude selebra tinan ne’e ho tema: “espíritu juventude 12 Novembru nian, lori ita hamutuk harii páz no autór ba dezenvolvimentu sustentavél”, ho sub-tema: “Hanoin hikas fali juventude loriku asu’wain nian”.
Jornalista : Natalino Costa
Editora : Julia Chatarina
