Prezidente Repúblika to’o ona iha Abu Dhabi hodi realiza vizita Estadu

ABU DHABI, 12 Novembru 2026 (TATOLI) – Prezidente Repúblika (PR), José Ramos-Horta, to’o ona iha Abu Dabi, hodi halo vizita Estadu, ho ajenda diplomátika atu hametin relasaun no esplora kooperasaun entre país rua.

Hafoin Xefe Estadu realiza vizita Estadu bá Repúblika Koreia Súl, husi loron 5 to’o 7 Novembru, no vizita trabllau bá Béljika, husi loron 9 to’o 10 Novembru, no Fransa, husi loron 11 to’o 12 Novembru, ohin kontinua ninia vizita Estadu ba Abu Dhabi, tuir konvite husi Prezidente Emiradu Árabe Unidu (EAU), Sua Alteza Sheikh Mohamed bin Zayed Al Nahyan.

Prezidente Repúblika ho delegasaun ho vou komersiál flight No. EY-32 husi Paris, Fransa, to’o iha aeroportu internasionál Abu Dhabi iha tuku 19h40 kalan oras lokál, ne’ebé simu husi Ministru Estadu no Ministru Estranjeiru EAU, Saeed Bin Burak AI Hajeri, Embaixadór Timor-Leste iha Abu Dhabi, Rui Hanjam, no Embaixadór EAU Naun-rezidente ba Timor-Leste, Abdulla Salem Obaid Salem ALDhaheri. Iha tuku 21h00 kontinua kedas bá Emirate Hotel hodi deskansa, ne’ebé hetan seguransa másima husi autoridade polisiál sira.

Tuir ajenda, iha loron 13 Novembru, Xefe Estadu sei halo enkontru ho entidade oioin.
Iha 14 Novembru, sei halo enkontru ho Ministru Estadu no Ministru Negósiu Estranjeiru EAU, Noura AI Kaadi.

Iha 15 Novembru, sei halo enkontru bilaterál ho omólogu Prezidente EAU.
Aleinde ne’e, Ministru Asuntu Estranjeiru ba Negósiu no Asuntu Sosiál, Badr Jafar, sei oferese jantar espesiál ba Premiadu Nobel ba Pás ne’e.i

Iha 16 Novembru, sei hasoru malu ho Sekretáriu-Jerál Zayed Award ba Fraternidade Umana, Mohamed Abdelsalam.

Hafoin ne’e iha tuku 21h00 kalan oras lokál, Xefe Estadu ho delegasaun sei halo viajen mai fali Denpasar, Bali, Indonézia, no iha loron 17 Novembru sei to’o hikas fali Timor-Leste.

Notísia relevante: PR Ramos-Horta agradese apoia Koreia Súl ba dezenvolvimentu Timor-Leste

Jornalista: Nelson de Sousa

Editora: Maria Auxiliadora