PTR aseita ho dezeñu ba edifísiu andar lima Supremu Tribunál Justisa

DILI, 13 Novembru 2026 (TATOLI)–Prezidente Tribunál Rekursu (PTR), Afonso Carmona, aseita ho dezeñu ba edifísiu foun Supremu Tribunál Justisa.
“Edifísiu Supremu Tribunál Justisa ne’e dezeñu foun duni, tanba ha’u koko atu haree uma nia forma ne’e. No ha’u aseita ona modelu dezeñu ba Supremu Tribunál ne’e,” Afonso Carmona hateten ba jornalista sira iha nia knaar fatin, Tribunál Rekursu, Kaikoli, Sesta ne’e.
Ekipa téknika husi Tribunál Rekursu hamutuk ho tékniku husi empreza ne’ebé halo dezeñu ba edifísiu halo enkontru no aprezenta ona dezeñu.
Notísia relevante : Reabilitasaun ba edifísiu Supremu Tribunál atinje ona pursentu 70
Fatin ba konstrusaun edifísiu Supremu Tribunál iha edifisiu Tribunál Judisiál Primeira Instánsia Dili nia sorin, parte loro sa’e nia rai ne’e libertadu ona.
“Tuir dezeñu ba edifísiu foun Supremu Tribunál Justisa ne’e haat, foin daudaun husi parte empreza aprezenta haat, maibé ha’u deside aumeta tan andar ida, entaun edifísiu ne’e sai ona andar lima. Iha reuniaun ikus ha’u aseita ona, ne’e ita sei avansa ba nia konstrusaun, espera tinan oin bele hahú ona,” nia akresenta.
Konstrusaun ba edifísiu ba Supremu Tribunál Justisa iha antigu edifísiu Tribunál Distritál Dili ne’ebé lokaliza iha Kolmera.
Jornalista : Natalino Costa
Editora : Julia Chatarina

