Tribunál halo prosesu sumáriu hasoru Ajente nain-rua Administrasaun Públika uza patrimóniu Estadu ba interese privadu
DILI, 13 Novembru 2026 (TATOLI)–Tribunál Judisiál Primeira Instánsia Dili (TJPID), iha Sesta ne’e, halo prosesu sumáriu hasoru ajente rua Administrasaun Públika ho inisiál RdA no VdCB ne’ebé molok ne’e ekipa husi Komisaun Antí-Korrupasaun (CAC, sigla portugés) halo apreensaun tanba lori karreta Estadu ba interese privadu.
Arguidu na’in-rua nu’udar ajente Administrasaun Públika ne’ebé hala’o knaar iha Ministériu Interiór no Parlamentu Nasionál.
Ekipa CAC halo operasaun iha Tersa (10/11) no halo apreensaun ho fraglante delitu, nune’e konsege asegura kedan motorista bá edifísiu CAC iha Farol inklui evidénsia sira hodi submete ba prosesu identifikasaun.
Notísia relevante : CAC halo apreensaun ba karreta Estadu inklui asegura motorista tanba tula dirijente nia oan
Arguidu ida lori kareta Estadu tula nia oan bá Eskola Portugueza Dili iha Balide, no ida seluk tula nia oan bá Eskola ida besik Universidade Dili (UNDIL) iha Kintál Boot.
Daudaun ne’e arguidu na’in-rua libertadu hafoin hetan detensaun durante 72 oras.
CAC aprezenta ba Ministériu Públiku ho krime pekulatu de uzu tanba uza kareta Estadu ba interese privadu.
Iha alegasaun, Defeza liuhusi Defensór Públiku Marçal Mascarenhas husu Tribunál atu aplika pena administrasaun hodi fó hanoin ba arguidu sira atu nune’e labele kontinua utiliza veíkulu Estadu tula família.
Enkuantu, Ministériu Públiku ne’ebé reprezenta husi Prokuradór Domingos Goveia Leite husu Tribunál atu aplika pena suspensaun.
Rona tiha alegasaun, Tribunál liuhusi José Maria deside adia ba Tersa (17/11) tuku 14:30 hodi fó sai despaisu.
Jornalista : Natalino Costa
Editora : Julia Chatarina
