DILI, 28 outubru 2020 (TATOLI)-Tribunál Distritál Dili (TDD), liuhosi julgamentu primeiru interrogatóriu aplika medida prizaun preventiva ba arguidu na’in-lima ho inisiál P, A, M, J ho A ne’ebé deskonfia envolve iha kazu oho (lori tudik sona) vítima Joaquin dos Santos da Silva, iha Aldeia Laclo-Lema, Suku Dato, Postu Administrativu Liquiça Vila, Munisípiu Liquiça, kinta (22/10).
Notísia Relevante : MP haruka ona kazu oho Joaquim ba Tribunál
Arguidu sira-ne’e hetan detensaun iha polísia durante oras 72 ne’ebé antes ne’e parte autoridade seguransa kaptura uluk arguidu na’in-rua P no A, iha loron domingu foin lalais, Tribunál deside aplika prizaun preventiva no arguidu na’in-tolu seluk foin submete horiseik ba julgamentu primeiru interrogatoriu.
Kazu omisídiu ne’e akontese tanba problema hadau-malu fatin suru rai-henek.
Prosesu ne’e Ministériu Públiku (MP) akuza arguidu sira ho krime omisídiu agravadu no arma branka.
Defensór Públiku, Eustáquio Guterres, ne’ebé fó asisténsia ba arguidu sira hateten, razaun Tribunál aplika medida ne’e tanba iha indísiu forte katak iha envolvimentu esforsu arguidu sira nia hodi oho vítima.
Julgamentu primeiru interrogatóriu ne’e prezide hosi juis Afonso Carmona, MP reprezenta hosi Prokudór Hernánio Rangel.
Jornalista: Nelson de Sousa
Editór: Francisco Simões
