DILI, 26 janeiru 2021 (TATOLI)—Reprezentante povu sira iha uma fukun Parlamentu Nasionál (PN), ohin, diskute proposta-lei ida no proposta-rezolusaun ida ho karáter urjénsia.
Tuir ajenda ne’ebé Agência TATOLI asesu haktuir, deputadu sira sei halo diskusaun no votasaun faze jeneralidade ba proposta-lei no II/V(2a)—aprova rejime jurídiku ba arbitrajen voluntáriu no halo alterasaun ba Kódigu Prosesu Sivíl.
Iha parte lokraik sei halo diskusaun no votasaun ba proposta-rezolusaun no. 3/V(2a)—adezaun Timor-Leste ba konvensaun Nova Iorke kona-ba rekoñesimentu no ezekusaun sentensa arbitrál estranjeira, maibé ida-ne’e adia tanba fallansu tékniku iha relatóriu no paresér.
Nune’e mós halo diskusaun no votasaun ba proposta-rezolusaun no. 4/V(2a)-aprova akordu servisu aéru entre Governu RDTL no Governu Austrália. Proposta-rezolusaun ne’e aprezenta hosi Ministériu Negósiu Estranjeiru no Kooperasaun (MNEK).
“Proposta-lei no proposta-rezolusaun ne’e importante tanba ne’e mak Governu husu atu diskute. Komisaun A mós haree ona katak pertinente duni atu parlamentu bele aprova,” Prezidente Komisaun A, Deputadu Joaquim dos Santos “Boraluli”, ko’alia iha resintu Parlamentu Nasionál.
Nia esplika, proposta-rezolusaun ida kona-ba rekoñesimentu no ezekusaun sentensa arbitrál estranjeira. Relatóriu no paresér aprova ona iha loron kinta 21 janeiru semana kotuk.
Nia fundamenta, substánsia hosi proposta-lei hirak ne’e sei doskute iha plenária.
Jornalista: Evaristo Soares Martins
Editór: Cancio Ximenes
