DILI, 08 marsu 2021 (TATOLI)—Sala Situação Centro Integrado Gestão de Crises (SS-CIGC sígla portugés) liu hosi Koordenadór Forsa-Tarefa ba Prevensaun no Mitigasaun, Rui Maria de Araújo, konsidera feto mak sai hanesan ai-rin ba prevensaun COVID-19.
Rui Araújo hato’o konsiderasaun ne’e liu hosi konferénsia imprensa, ne’ebé hala’o iha Centro Convenções Dili, segunda ne’e.
Notísia Relevante:COVID-19, papél pesoál saúde feto hosi fó asisténsia to’o halo evakuasaun
“Loron 8 marsu ita selebra loron internasionál feto. Tanba ne’e, lori SS-CIGC nia-naran hato’o parabens ba feto Timor-Leste. Feto sira mak sai ai-rin ne’ebé forte ba prevensaun COVID-19,” Médiku ne’e kongratula.
Portavóz SS-CIGC ne’e konvida no enkoraja nafatin feto Timoroan hotu-hotu, atu hamutuk ho mane sira enfrenta dezafiu boot ne’ebé nasaun tomak enfreta maka tenke luta kontra COVID-19.
Nia mós rekoñese katak, iha uma kain ida nia-laran, normalmente feto-sira mak sai ai-rin ne’ebé forte atu fó hanoin nafatin ba oan-sira, no fó hanoin nafatin ba membru família-sira atu disiplina, mantein distansiamentu sosiál no prátika ijiene pesoál iha kada família.
Jornalista: Felicidade Ximenes
Editór: Cipriano Colo
