DILI, 07 abríl 2021 (TATOLI) -Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Lere Anan Timur, kuarta ne’e, vizita abitante sira afetadu dezastre naturál ne’ebé evakua ka refuijia ba sentru evakuasaun Dom Bosco Comoro, João Paulo II no Ministériu Finansas, Dili.
Tenente Jenerál Lere Anan Timur ho ekipa-sira AFAMA nian lori mós apoiu sasán nesesidade báziku hanesan supermi, mina, sabaun, rinso no masin hodi ajuda abitante sira iha sentru refujiadu sira-ne’e.
Notísia Relevante : Espoza PR fó apoiu nesesidade bázika ba vítima dezastre naturál
Apoiu ne’e mai hosi instituisaun F-FDTL ho Asosiasaun Família Asuwa’in Militár (AFAMA).
Iha vizita ba família iha sentru evakuasaun iha João Paulo II, Lere Anan Timur, hateten ho kbiit ne’ebé natoon ho apoiu ne’e bele tulun abitante sira mezmu ho uitoan, maibé bele sustenta netik iha situasaun emerjénsia.
Nia mós fó korajen no esperansa nafatin ba abitante sira atu reza ba Maromak ho situasaun difisil ne’ebé lori taterus boot tanba lakon sasán uma-laran, lakon hela-fatin no balun lakon vida.
Lere Anan Timur dehan, Timor-Leste hasoru kalamidade ne’ebé boot rua; dezastre natural ho COVID-19 ne’ebé halo difisil tebes no hein Governu sei tau matan hodi responde ba família vítima sira.
Informasaun ne’ebé Agência Tatoli asesu hosi mídia Komandu F-FDTL apoiu ne’ebé instituisaun F-FDTL ho AFAMA oferese ne’e ba iha uma-kain 1.440 sira iha area Becora, Bidau, Hera ho sentru evakuasaun iha Bon Bosco Comoro, João Paulo II, Tasi-Tolu, Ministériu Finansa ho sira seluk tan.
Jornalista : Nelson de Sousa
Editór : Francisco Simões
