DILI, 07 setembru 2021 (TATOLI)—Durante iha fulan agostu, Polísia Nasionál Nasionál Timor-Leste (PNTL), liu hosi Departamentu Tránzitu Rodoviáriu Nasionál, rekolla reseita $39.279, ba kofre Estadu.
Reseita ne’e mai hosi atividade operasaun Polísia Tránzitu, hodi aplika koima ba utilizadór motorizada no karreta ne’ebé viola kódigu estrada.
Notísia relevante:Polísia tránzitu Dili halo apreensaun ba motór-karreta 138
Tuir relatóriu polísia iha fulan agostu, hosi territóriu rejista totál infrasaun hosi ema 1.719 mak viola kódigu estrada, hanesan la uza xapa matríkula, la uza espellu, kontra órden autoridade públika no karta kondusaun laiha.
“Durante fulan agostu ita hatama reseita $39.279 ba kofre Estadu,” Komandante Tránzitu Nasionál, Superitendente, João Belo dos Reis, hateten ba jornalista-sira liu hosi konferénsia imprensa, iha edifísiu Komandu Jerál PNTL, Caicoli, tersa ne’e.
Infratór sira ne’e simu billete hodi ba selu koima direta iha Banku Nasionál Komérsiu Timor-Leste (BNCTL, sígla portugés), hafoin bele mai foti fali dokumentu ka veíkulu ne’ebé halo apreensaun.
Polísia tolera populasaun ne’ebé dokumentu inválidu iha periúdu Estadu emerjénsia, tanba ne’e husu populasaun atu kumpre nafatin kódigu estrada, hodi halo prevensaun ba dezastre.
Hosi reseita ne’e mai hosi munisípiu Aileu rekolla $1.120, Ainaro $$870, Baucau $906, Bobonaro $685, Covalima $1.200 no Dili $25.669.
Hosi Ermera $226, Lautem $120, Liquiça $227, Manatuto $162, Manufahi $781, RAEOA $120 no Viqueque $325.
Jornalista: Nelson de Sousa
Editór: Cipriano Colo
