DILI, 20 setembru 2021 (TATOLI)—Governu liuhosi reuniaun Konsellu Ministru (KM) extraordinária, aprova Projetu Dekretu-Lei ne’ebé aprezenta hosi Ministru Finansa, Rui Augusto Gomes, kona-ba kria subsídiu mensál transporte ba servidór Estadu sira.
Tuir Ministru Prezidénsia Konsellu Ministru, Fidelis Manuel Leite Magalhães, subsídiu ne’e ba titulár sira iha kargu diresaun no xefia, inklui ba funsionáriu sira administrasaun públika, atu substitui atribuisaun veíkulu Estadu.
“Kriasaun subsídiu ne’e atu kompensa kustu regulár hosi benefisiáriu sira, relasiona ho transporte no mós atu hamenus despeza hosi atribuisaun veíkulu Estadu no promove rasionalizasaun ba parke automóvel públiku,” Ministru Fidelis relata hafoin ramata reuniaun ezekutivu, iha Palásiu Governu, segunda ne’e.
Notísia relevante: Governu planeia kria subsídiu alimentár no transporte ba funsionáriu públiku
Montante mensál subsídiu nian ho valór $25 ba funsionáriu públiku sira, $50 ba Xefe sesaun, $75 ba xefe departamentu, $100 ba diretór nasionál sira no $150 ba diretór jerál sira.
“Kalkula katak medida ne’e permite atu alkansa poupansa ida liu $700.000, kona-ba kustu atuál akizisaun no manutensaun ba veíkulu no kombustível nian,” Portavóz Governu dehan.
Projetu Dekretu-Lei ne’e sei haruka ba Prezidente Repúblika hodi hetan promulgasaun no hahú implementa iha fulan-janeiru 2022.
Jornalista : Antónia Gusmão
Editora : Julia Chatarina
