DILI, 21 fevereiru 2022 (TATOLI)-Prezidente Komisaun Nasionál Eleisaun (CNE,siglá portugués), José Agostinho da Silva, hateten CNE sei uza lian tetún ho portugués iha debate ba kandidatu prezidente repúblika periodu 2022-2027 hamutuk ema na’in 16 ne’ebé sei realiza iha loron 08 fulan-marsu.
“Tuir konstituisaun kandidatu sira mós iha kapasidade naton tanba ne’e hosi CNE deside debate kandidatu PR pergunta balun tenke aprezenta no resposta ho lian portugés atu hatudu katak ita hakarak lori nasaun ne’e presiza mós kualidade atu serbí Estadu,’’Prezidente CNE ne’e deklara ba jornalista sira hafoin halo sorumutu ho Xefe Estadu, iha Palásiu Prezidensiál Bairo-Pité Dili, segunda ne’e.
Notísia Relevante :Akademista-Sosiedade Sívil sei prepara pergunta ba debate kandidatu PR
Tuir nia debate ba kandidatu PR sira ne’e, importante hodi aprezenta prozesaun no papél dinámika, nune’e bele ajuda eleitór sira atu hili iha eleisaun Prezidensiál iha loron 19 fulan-marsu 2022.
Durante sorumutu ho Xefe Estadu ne’e, Prezidente CNE hato’o mós kona-ba planu no programa CNE liga ho preparasaun ba eleisaun prezidensiál hanesan serimonia rituál husi lia-na’in sira iha Munisípiu ida-idak antes tama ba loron kampaña eleitorál.
Nune’e mós sei halo programa asina paktu unidade entre kandidatu prezidente repúblika hamutuk 16 hodi garante estabilidade durante kampaña to’o fó sai rezultadu eleisaun.
“Asina paktu entre kandidatu ne’e hodi fó hanoin kaer liman hamutuk oinsá fó hatene ba eleitór katak prosesu eleisaun lao demokrátiku la’os parte ida atu fahe ka insulta malu maibé oinsá reuni forsa hodi lori Prezidente Repúblika ida di’ak’’ Nia hateten
Jornalista: Nelson de Sousa
Editór :Agapito dos Santos
